دا معلوماتي پاڼه د 2025 کال د مارچ په 26 مه نیټه نوې شوې ده

لنډیز 

په دې معلوماتي پاڼه کې توضیح شوي دي چې د ګړندي ایستلو پروسه څه ده او دا په چا اغیزه کولی شي. په دې پاڼه کې همداراز د متحده ایالاتو د دولت د هڅو په اړه معلومات شریک شوي دي چې د 2025 کال په جنورۍ کې یې د ګړندي ایستلو پروسه پراخه کړه. په دې معلوماتي پاڼه کې دا لاندې معلومات شامل دي: 

• د ګړندي ایستلو د پروسې په اړه معلومات، 
• څوک به په دې پروسه کې شامل شي،
• که تاسو په دې پروسه کې شامل شۍ، څه به وشي، او 
• یو شخص کله کولی شي له دې پروسې څخه ووځي او هڅه وکړي چې په متحده ایالاتو کې پاتې شي.

د ګړندي ایستلو پروسه څه ده؟

د ګړندي ایستلو پروسه داسې یوه پروسه ده چې د متحده ایالاتو دولت ته لاره هواروي ترڅو ځینې ځانګړي کسان په چټکۍ سره له هیواد څخه وباسي. د ګړندي ایستلو پروسه له ډیرې مودې راهیسې کارول شوې ده ترڅو هغه کسان په چټکۍ سره وباسي چې له اجازې پرته متحده ایالاتو ته ننوتي او په پوله یا پولې ته نږدې سیمو کې د متحده ایالاتو د کډوالو د چارو له مامورینو سره مخامخ شوي دي. 

د ګړندي ایستلو په پروسه کې تاسو حق نلرئ چې قاضي وګورئ. بل دولتي چارواکی پرته له دې چې تاسو محکمې ته د خپلې قضیې د وړاندې کولو فرصت ولرۍ، ستاسو د ایستلو حکم کوي. وروسته له دې چې حکم صادر شو، تاسو به خپل اصلي هیواد ته ولیږدول شئ. ځینې وختونه تاسو بل هیواد ته هم لیږدول کیدی شئ. 

ما اوریدلي چې دا پروسه د ټرمپ په اداره کې بدله شوې ده. د ګړندي ایستلو په اړه نوې پالیسۍ څه دي؟ څرنګه وپوهیږم چې دا پالیسۍ پر ما اغیزه کوي که نه؟ 

دولت ویلي دي چې د 2025 کال د جنورۍ 23 مې نیټې څخه ډیر شمیر هغه کسان به د کړندۍ ایستلو په پروسه کې شامل شي چې له ویزې پرته متحده ایالاتو ته ننوتي او دا ثبوت کولی نشي چې له دوو کلونو څخه ډیره موده په متحده ایالاتو کې ژوند کوي. هغه خلک چې رسمي بندرونو ته ځي او متحده ایالاتو ته د ننوتلو غوښتنه کوي، د ګړندي ایستلو په پروسه کې شاملیږي. 

که تاسو د تیرو دوو کلونو په موده کې له ویزې یا قانوني اجازې پرته متحده ایالاتو ته ننوتي یاست، کیدی شي چې تاسو د ګړندي ایستلو په پروسه کې شامل شئ. د متحده ایالاتو دولت ویلي دي چې د 2025 کال د جنورۍ 23 مې نیټې څخه هڅه کوي حتی هغه کسان د ګړندي ایستلو په پروسه کې شامل کړي چې د لنډمهال اوسیدو یا (پرول) پروګرام له لارې متحده ایالاتو ته راغلي دي. ترهغه ځایه چې موږ پوهیږو، دولت اوس د متحده ایالاتو د کډوالو د ادارې چارواکو ته ویلي دي چې د هغو کسانو پرول وارزوي چې د پرول ځانګړو پروګرامونو له لارې متحده ایالاتو ته ننوتي دي او پریکړه وکړي چې ایا دوی د ګړندي ایستلو په پروسه کې شاملیدی شي که نه. 

دولت ویلي دي چې دا ارزونه په هغو کسانو د تطبیق وړ ګڼل کیږي چې د CBP One له لارې هیواد ته ننوتي دي او یا د کیوبا، هیتي، نیکاراګوا یا ونزویلا اتباع چې د پرول له لارې متحده ایالاتو ته راغلي دي. دا کیدی شي په نورو کسانو هم د تطبیق وړ وي. 

هغه کسان چې د پناه غوښتنې قضیې یې د کډوالۍ په محکمه کې دي، د متحده ایالاتو دولت به هڅه وکړي چې په محکمه کې ددوی قضیې یا کیسونه پای ته ورسوي او هغوی د ګړندي ایستلو په پروسه کې شامل کړي. دولت وایي چې دوی غواړي دا پالیسي د هغو کسانو په وړاندې ډیره وکاروي چې یو کال یا له یو کال څخه ډیرې مودې مخکې د پرول له لارې هیواد ته ننوتي دي او تر اوسه یې د پناه غوښتنې لپاره درخواست نه دی کړی. 

د 2025 په مارچ میاشت کې، دولت ځینې نور جزئیات خپاره کړل. په ځانګړې توګه، نوې پالیسۍ د کډوالو د اداري چارواکو ته وایي چې کله چې د کډوالۍ او ګمرکونو ICE پلټنې کوي، دوی کولی شي دا لاندې ډلې کسان د ګړندي ایستلو په پروسه کې او یا د کډوالۍ د چارو په محکمه کې د ایستلو په قضیه کې شامل کړي، که چیرې دوی د پناه غوښتنې غوښتنلیک نه وي وړاندې کړی: 

1. هغه کسان چې له اجازې پرته متحده ایالاتو ته ننوتي دي خو د کډوالو د ادارې چارواکو په پوله کې هغوی ته اجازه ورکړې ده چې متحده ایالاتو ته ننوځي، مهمه نه ده چې دوی څومره موده مخکې متحده ایالاتو ته ننوتي دي. 
2. هغه کسان چې متحده ایالاتو ته ننوتي او هغوی ته "مشروط پرول" یا "تر څارنې لاندې پرول" ورکړل شوی دی
3. هغه کسان چې په پوله کې د کډوالو د اداې چارواکو ورته "د رپوټ ورکولو خبرتیا" پاڼه ورکړې وي.

که تاسو دګړندي ایستلو په پروسه کې شامل شئ یا د کډوالو په محکمه کې تاسو لپاره قضیه پرانیستل شي، ستاسو د پرول موده په اتومات ډول پای ته رسیږي.

څه بدلون راغلی دی؟ دا بدلونونه ولې مهم دي؟ 

ددې بدلونونو څخه مخکې، هغه خلک چې د مخه په متحده ایالاتو کې وو، یوازې په هغه صورت کې د ګړندي ایستلو په پروسه کې شاملیدل چې د متحده ایالاتو له پولې څخه 100 مایله واټن کې او هیواد ته له ننوتلو 14 ورځې وروسته د متحده ایالاتو د حکومت له خوا نیول کیدل. 

اوس، که تاسو له ویزې یا بلې قانوني اجازې پرته د تیرو دوو کلونو په موده کې متحده ایالاتو ته ننوتي یاست یا که چیرې تاسو د پورتنیو ګروپونو له جملې څخه په یو ګروپ کې راځۍ، کیدی شي چې تاسو د ګړندي ایستلو په پروسه کې شامل شئ. دا مهمه نه ده چې تاسو له پولې څخه څومره لرې یاست. دا په دې معنی ده چې اوس ډیر شمیر کسان په متحده ایالاتو کې د ګړندي ایستلو په پروسه کې شاملیدلی شي. 

د ګړندي ایستلو پروسې په اړه عامې پوښتنې

که زه د ګړندي ایستلو په پروسه کې شامل شم، آیا کولی شم د پناه غوښتنه وکړم یا په متحده ایالاتو کې د پاتې کیدو لپاره د بلې قانوني اجازې غوښتنه وکړم؟ 

د ګړندي ایستلو په پروسه کې، تاسو یوازې کولی شئ چې یوه پروسه پیل کړئ ترڅو دا څرګنده شي چې آیا تاسو په متحده ایالاتو کې د پاتې کیدو لپاره د پناه غوښتلو یا د بلې قانوني اجازې د ترلاسه کولو اجازه لرئ که نه. که تاسو د ګړندي ایستلو په پروسه کې یاست، تاسو ترهغه دمه پناه غوښتنې ته درخواست نشئ کولی چې د متحده ایالاتو دولت تاسو ته د اجازې ورکولو په اړه پریکړه وکړي. 

څرنګه کولی شم د متحده ایالاتو له دولت څخه وغواړم چې ما ته اجازه راکړي چې د پناه غوښتنې لپاره درخواست وکړم؟

که تاسو خپل اصلي هیواد ته له ستنیدنې ویره لرئ، او تاسو د متحده ایالاتو دولت چارواکي ته ووایاست چې تاسو ویره لرئ، تاسو ته باید د مرکې فرصت برابر کړي. هغه څه چې تاسو په دې مرکه کې وایئ، د متحده ایالاتو دولت سره مرسته کوي ترڅو پریکړه وکړي چې آیا تاسو ته باید اجازه درکړل شي چې په متحده ایالاتو کې د پاتې کیدو لپاره د پناه غوښتنې یا د بلې قانوني اجازې درخواست وکړئ.  

په هر صورت، دیره مهمه ده چې په یاد وساتئ چې د کډوالو د اداري چارواکي دې ته اړ نه دي چې تاسو څخه پوښتنه وکړي چې آیا تاسو خپل هیواد ته له تللو ویره لرئ یا تاسو غواړئ چې پناه غوښتنې ته درخواست وکړئ. دا په دې معنی ده چې کیدی شي هغوی تاسو څخه پوښتنه ونکړي. له همدې امله، که تاسو له ستنیدنې څخه ویره لرئ، تاسو باید د متحده ایالاتو چارواکو ته ژر تر ژره او څومره چې امکان لري تشریح کړئ. تاسو کولی شئ یو څخه ډیرو کسانو ته ووایئ او تاسو همداراز کولی شئ چې له یو ځل څخه ډیر هغوی ته ووایئ. 

دا هم ډیره مهمه ده چې وپوهیږئ که تاسو خپلې کورنۍ سره یوځای یاست، کیدی شي چې له یوبل څخه جلا شئ. نوځکه، که تاسو خپل اصلي هیواد ته له ستنیدنې ویره لرئ، تاسو باید ډاډ ترلاسه کړئ چې ستاسو د کورنۍ هر غړی په دې وپوهیږي، او باید وپوهیږي چې دوی هم باید ژر تر ژره او څومره ځله چې امکان لري د متحده ایالاتو چارواکو ته ووایي چې خپل هیواد ته له ستنیدنې ویره لري. حتی کوچني ماشومان هم باید به دې وپوهیږي.  

د مرکې پروسه څرنګه ده؟

که تاسو د متحده ایالاتو د کډوالو د ادارې چارواکو ته ووایئ چې خپل هیواد ته له ستنیدو ویره لرئ، تاسو سره باید مرکه وشي. ستاسو حالت ته په پام سره، دا مرکه کیدی شي "د باور وړ ویرې مرکې" یا "د ریښتنې ویرې مرکې" په نوم وي. ددې مرکې په اړه د پوهیدو لپاره مهم ټکی دا دی چې د کډوالو د ادارې چارواکی هڅه کوي وپوهیږي چې تاسو ولې خپل هیواد ته له ستنیدنې ویره لرئ او آیا په متحده ایالاتو کې د پاتې کیدو لپاره باید تاسو ته د درخواست کولو اجازه درکړل شي که نه. ډیره مهمه ده چې د متحده ایالاتو د کډوالو د ادارې له چارواکو سره په هره مرکه کې رښتیا ووایاست. 

په یاد ولرئ چې دا مرکه تاسو ته پناه نه در کوي. که تاسو دا مرکه په بریالیتوب ترسره کړه، دا به یوازې تاسو ته د پناه غوښتنې فرصت درکړئ. 

تاسو کولی شئ ددې مرکو په اړه لازیات معلومات دلته ترلاسه کړئ.

تاسو ته به همداراز د یوې بلې مرکې فرصت برابر شي چې "د شکنجې په وړاندې د مبارزې کنوانسیون" د ارزونې په نوم یادیږي. په دې مرکه کې د هغې شکنجې په اړه پوښتنه کیږي چې کیدی شي تاسو تجربه کړې وي یا که تاسو یو ځانګړي هیواد ته ولیږل شئ، تاسو یې د تجربه کولو ویره لرئ.  

که زه د کړندي ایستلو په پروسه کې شامل شم، آیا زه به بندي شم (په توقیف کې وساتل شم)؟

هو، تاسو توقیف کیدی شئ، او احتمال لري چې تاسو توقیف شئ. ډیر شمیر خلک چې د ګړندي ایستلو په پروسه کې شاملیږي، کله چې د متحده ایالاتو چارواکي د اخراج پروسه پیل کوي او یا هم د مرکې د پروسې په اوږدو کې، په توقیف کې ساتل کیږي. توقیف کیدل د بندي کیدو په معنی دی. 

آیا د ګړندي ایستلو په پروسه کې کولی شم وکیل ولرم؟

هو، تاسو اجازه لرئ چې وکیل ولرئ. ګړندۍ ایستنه ډیره په چټکه ترسره کیږي، نو مهمه ده چې ژر تر ژره له یو وکیل سره اړیکه ونیسئ. 

د توقیف کیدو په صورت کې، تاسو حق لرئ چې د وکیل غوښتنه وکړئ او همداراز د وکیل د پیدا کولو لپاره د ټیلفوني اړیکي حق لرئ. (دا په دې معنی ده چې چارواکي نشي کولی تاسو د وکیل له غوښتلو څخه منع کړي او دوی نشي کولی تاسو د وکیل د پیدا کولو لپاره له ټیلفوني اړیکې څخه منع کړي.)

مهمه ده چې د هغو اسنادو له لاسلیک کولو ډډه وکړئ چې تاسو پرې نه پوهیږئ. که تاسو هغه څوک یاست چې د ګړندي ایستلو په پروسه کې د شاملیدلو له خطر سره مخ یاست، دا به ډیره ګټوره وي چې مخکې له دې چې د قانون د تطبیق چارواکو سره مخ شئ، له یو وکیل سره خبرې وکړئ. 

څرنګه کولی شم د ګړندي ایستلو له پروسې څخه ووځم؟ آیا کولی شم قاضي وګورم؟

که تاسو د باور وړ ویرې مرکه یا د ریښتنې ویرې مرکه ترسره کړه، تاسو به د کډوالۍ محکمې په پروسه کې شامل شئ. دا په دې معنا ده چې تاسو به د کډوالو د چارو قاضي ته د خپلې قضیې د وړاندې کولو فرصت ترلاسه کړئ. که تاسو د کډوالو د ادارې چارواکو ته و نه وایاست چې تاسو خپل هیواد ته له ستنیدنې ویره لرئ، او که تاسو  باور وړ ویرې یا د ریښتنې ویرې مرکې مثبته پریکړه ترلاسه نکړئ، د متحده ایالاتو د کډوالو د ادارې چارواکي کولی شي د قاضي له لیدو پرته تاسو په چټکه اخراج کړي. که تاسو د ګړندي ایستلو پروسې څخه خلاص شئ او د کډوالو د محکمې په پروسه کې شامل شئ، تاسو به بیا هم د قضیې د پاتې مودې لپاره په توقیف کې پاتې شئ. 

که د ګړندي ایستلو په اړه اندیښنه ولرم، څه کولی شم؟ 

هرڅوک چې په متحده ایالاتو کې دایمي قانوني حالت ونلري، او څوک چې له دوو کلونو څخه لږ وخت دمخه هیواد ته ننوتي وي، باید د امکان په صورت کې د خپل حالت په اړه د کډوالو د چارو وکیل سره مشوره وکړي. د کډوالو د چارو وکیل کولی شي تاسو سره مرسته وکړي چې پریکړه وکړئ چې آیا د پناه غوښتنه یا په متحده ایالاتو کې د پاتې کیدو لپاره د اجازې غوښتنه کولی شي ستاسو د حالت لپاره ګټور وي. موږ دقیقا نه پوهیږو چې د متحده ایالاتو د کډوالو چارواکي به څرنګه دا نوې پالیسۍ تطبیقوي. 

که تاسو د ګړندي ایستلو په اړه پوښتنه لرئ، ځینې اسناد او شواهد شته چې تاسو یې باید هروخت له ځان سره ولرئ ترڅو د قانون د پلي کولو چارواکو سره د مخامخ کیدو په صورت کې یې ښکاره کړئ. دا اسناد او شواهد په لاندې ډول دي: 

• که تاسو په متحده ایالاتو کې قانوني حالت لرئ:
  • د خپل قانوني حالت شواهد، لکه هغه اسناد چې ستاسو د کډوالۍ یا تابعیت حالت ښیي
• که تاسو په محکمه کې پرانیستې قضیه لرئ یا ستاسو غوښتنلیک د ارزونې لاندې دی:
  • اسناد یا نور ثبوت چې ښیي تاسو په محکمه کې پرانیستې قضیه لرئ یا ستاسو غوښتنلیک د ارزونې لاندې دی، په ځانګړې توګه که تاسو د پناه غوښتنه کړې وي. له بده مرغه، کیدی شي چې دولت بیا هم تاسو د ګړندي ایستلو په پروسه کې شامل کړي.  
• که تاسو هیواد ته له دوو کلونو څخه ډیره موده مخکې ننوتي یاست:
  • هغه اسناد چې ښیي تاسو څومره موده په متحده ایالاتو کې ژوند کړی دی. په دې اسنادو کې د الوتکې ټکټ، د ایالت د پیژندنې یا هویت کارت، د کتابتون کارت، د پوستې له لارې ترلاسه شوی لیک چې ستاسو نوم او د کور پته پرې لیکل شوې وي، د ښوونځي ریکاردونه، د کرایي کور قرارداد، او نور ورته اسناد چې ښیي تاسو له دوو کلونو څخه ډیره موده په متحده ایالاتو کې ژوند کړی دی. 

په یاد ولرئ چې تاسو اړ نه یاست چې د خپل کډوالۍ حالت په اړه پوښتنو ته ځواب ورکړئ - که د کډوالو ادارې د چارواکو له خوا تاسو څخه پوښتنه وشي، نو د خپلو حقونو په اړه نور معلومات دلته وګورئ. 

اضافي معلومات او سرچینې

   د ګړندي ایستلو پروسې د پراخیدو په صورت کې، خپل حقونه وپیژنئNILC

کډوالو لپاره د عدالت ملي مرکز: د کډوالۍ او ګمرکونو د تطبیق چارواکو ICE سره د مخامخ کیدو په صورت کې خپل حقونه وپیژنئ