د کډوالو مرستې نړيواله پروژه (آی ار ای پي) ځينو کډوالو او بې ځايه شويو خلکو ته وړيا قانوني مرستې چمتو کوي.
- آی ار ای پي له ځينو خلکو سره مرسته کوي، چې خدمات پيدا کړي، او د کډوالۍ يا ويزې غوښتنو لپاره چمتوالي ونيسي
- آی ار ای پي د هيڅ دولت، آی او ايم، يا يو اين ايچ سي ار برخه نه ده
- آی ار ای پي نه شي کولای چاته د کډوالۍ حيثيت، يا ويزه ورکړي، يا يې قضيې چټکې کړي
- آی ار ای پي نه شي کولای مالي مرستې چمتو کړي، د هستوګنځي لپاره پيسې ورکړي، يا دندې پيدا کړي
- د آی ار ای پي ټولې مرستې وړيا دي. هيڅوک چې له آی ار ای پي سره شريک دی دا حق نه لري چې له تاسې څخه د پيسو يا نورو خدماتو غوښتنه وکړي.
آی ار ای پي پرېکړه کوي چې له خلکو سره د کډوالۍ د حيثيت لپاره د هغوی د اړتياوو او وړتياوو پر اساس مرستې وکړي. آی ار ای پي دا پرېکړه نه کوي چې له خلکو سره د نورو ټولنيزو يا سياسي يا مذهبي معيارونو پر اساس مرسته وکړي.
دا ويبپاڼه د قانوني پروسو په هکله چې ځينو کډوالو ته مهيا دي، عمومي معلومات ورکوي. دا د انفرادي غوښتنو لپاره د قانوني مشورې په معنی نه دی.
دا معلومات د ۲۰۲٣ کال د جنوری په مياشت کې بيا کتل شوي. کېدای شي غوښتنې بدلې شي. هميشه د حکومت يا هغې ادارې نوي معلومات وګوره، چې ستا د غوښتنې په اړه پرېکړه کوي.
که ته داسې کډوال يې چې په بېړه کې يې، موږ سپارښتنه کوو چې په هغه هيواد کې د يو اين ايچ سي ار له دفتر سره اړيکه ونیسه چرته چې اوس ژوند کوې.
د متحده ایالاتو حکومت له افغانستان څخه د خپلو ځواکونو د وتلو لړۍ پای ته رسولې، او په کابل کې یې سفارت تړلی دی. د غوښتنلیکونو د طی مراحل بشپړیدل او د ویزې ترلاسه کول په افغانستان کې امکان نلري. د کډوالۍ ځانګړې ویزې غوښتونکي کولی شي یا خپل کیس له افغانستان څخه بهر بل هیواد کې د متحده ایالاتو سفارت ته انتقال کړي، یا که د ماموریت مشر COM منظوري یې ترلاسه کړې وي، د وتنې مرستو ته په تمه اوسي.
د 2023 له جنورۍ څخه، د متحده ایالاتو دولت یو ډیر محدود شمیر افغانانو لپاره د وتلو مرستې او د انتقال پروازونه برابر کړي دي. د متحده ایالاتو دولت اوس مهال له ټولو هغو افغانانو څخه چې د وتلو مرستې ترلاسه کوي غواړي چې معتبر پاسپورتونه له ځان سره ولري.
د #AfghanEvac په نوم غیردولتي او غیرانتفاعي موسسې د متحده ایالاتو د دولت له خوا د انتقال پروازونو لپاره د واجدیت شرایط معلومات دلته وړاندې کړي دي.
د متحده ایالاتو دولت د کورنۍ اړیکو په اساس د وتلو د مرستو لپاره د واجدیت شرایط معلومات دلته وړاندې کړي دي. د متحده ایالاتو دولت ویلي دي چې واجد شرایط افغانانو سره به د وتلو د مرستو په اړه اړیکه نیسي. له افغانستان څخه د انتقال د هڅو لپاره د متحده ایالاتو د حکومت د همغږۍ ټیم چې د (CARE) په نوم یادیږي، د CARETravelData@state.gov بریښنالیک له لارې د وتنې د مرستو په اړه افغانانو سره اړیکه نیسي. د هغو افغانانو لپاره چې د CARE د مرستو په اړه ورسره مخکې اړیکه نیول شوې ده، د متحده ایالاتو د دولت د ټیلفون شمیره +1 833-839-0375 ده. د متحده ایالاتو دولت د مرستو د درخواست لپاره کومه طریقه نه ده وړاندې کړې او ویلي یې دي چې له هغو افغانانو سره به اړیکه نیسي چې واجد شرایط ګڼل کیږي. تراوسه دا روښانه نه ده چې ایا هغو افغانانو سره چې د CARE له خوا ورسره اړیکه نیول شوې نه ده، د پورتنۍ ټیلفوني شمیرې یا بریښنالیک له لارې به اړیکه ونیول شي او که نه. د CARE له خوا اړیکه په دې معنی نه ده چې د متحده ایالاتو دولت کولی شي د وتلو مرستې برابرې کړي یا تاسو سره له افغانستان څخه په وتلو کې مرسته وکړي.
ډیر شمیر افغانان د متحده ایالاتو له دولت څخه د وتلو مرستو ته په تمه دي. داسې اټکل یا وړاندوینه امکان نلري چې ایا د متحده ایالاتو دولت کولی شي چې ټولو واجد شرایط افغانانو سره له افغانستان څخه د وتلو په برخه کې مرسته وکړي که نه.
IRAP د وتنې د پروسې غوښتنلیکونو ته د مرستې د برابرولو توان نلري.
نورو هیوادونو ته مسافرت
دا پاڼه د افغانستان شا او خوا هیوادونو کې د کډوالۍ د موقف په اړه معلومات وړاندې کوي. IRAP له افغانستان څخه د وتنې، له افغانستان څخه د وتنې د لاروچارو، او یا هم د تګ لپاره د ځایونو په اړه مشوره نشي ورکولی.
هغه کسان چې د متحده ایالاتو ویزې لپاره درخواست کوي، کولی شي د خپل غوښتنلیک لړۍ له ډیر شمیر هیوادونو څخه چې پکې د متحده ایالاتو سفارت موقعیت لري، تعقیب کړي.
حقوقي معلومات او سرچینې
د کډوالۍ د لاروچارو په اړه معلوماتو لپاره چې کیدی ځینې اشخاص ورته واجد شرایط وي، هیله کیږي د IRAP حقوقي معلوماتو ویب پاڼې ته ورشئ او افغانانو لپاره د حقوقي سرچینو پاڼه وګورئ.