د کډوالو مرستې نړيواله پروژه (آی ار ای پي) ځينو کډوالو او بې ځايه شويو خلکو ته وړيا قانوني مرستې چمتو کوي.

• آی ار ای پي له ځينو خلکو سره مرسته کوي، چې خدمات پيدا کړي، او د کډوالۍ يا ويزې غوښتنو لپاره چمتوالي ونيسي
• آی ار ای پي د هيڅ دولت، آی او ايم، يا يو اين ايچ سي ار برخه نه ده
• آی ار ای پي نه شي کولای چاته د کډوالۍ حيثيت، يا ويزه ورکړي، يا يې قضيې چټکې کړي
• آی ار ای پي نه شي کولای مالي مرستې چمتو کړي، د هستوګنځي لپاره پيسې ورکړي، يا دندې پيدا کړي
• د آی ار ای پي ټولې مرستې وړيا دي. هيڅوک چې له آی ار ای پي سره شريک دی دا حق نه لري چې له تاسې څخه د پيسو يا نورو خدماتو غوښتنه وکړي.

آی ار ای پي پرېکړه کوي چې له خلکو سره د کډوالۍ د حيثيت لپاره د هغوی د اړتياوو او وړتياوو پر اساس مرستې وکړي. آی ار ای پي دا پرېکړه نه کوي چې له خلکو سره د نورو ټولنيزو يا سياسي يا مذهبي معيارونو پر اساس مرسته وکړي.

دا ويبپاڼه د قانوني پروسو په هکله چې ځينو کډوالو ته مهيا دي، عمومي معلومات ورکوي. دا د انفرادي غوښتنو لپاره د قانوني مشورې په معنی نه دی.

 غوښتنې ممکن بدلون ومومي. تل د حکومت یا ادارې څخه وروستي معلومات وګورئ چې ستاسو د غوښتنې په اړه پریکړه کوي.

که تاسو د کډوالۍ په بیړني حالت کې یاست، موږ وړاندیز کوو چې تاسو په هغه هیواد کې د UNHCR دفتر سره اړیکه ونیسئ چیرې چې تاسو اوسیږئ.

لنډیز

په دې لارښوود کې توضیح شوي دي چې په لاندې حالاتو کې څرنګه کولی شو د کډوالۍ ځانګړې ویزې لپاره خپل غوښتنلیک بل ځای ته انتقال کړو:  

• که چیرې تاسو د کډوالۍ ځانګړې ویزې غوښتنلیک پیل کړی وي؛
• په متحده ایالاتو کې نه یاست
• ستاسو کیس اوس هم په کابل کې د متحده ایالاتو په سفارت کې دی، یا
• ستاسو کیس د هغه هیواد په سفارت یا کنسلګرۍ کې دی چې تاسو پکې ژوند کوۍ
  

که چیرې تاسو د ماموریت د مشر (COM) د منظورۍ د ترلاسه کولو په پړاو یاست

د غوښتنلیک په پروسه کې، د ماموریت د مشر (COM) منظوري د بریښنالیک له لارې ترسره کیږي او د نړۍ په ګوټ ګوټ کې په ټولو موقعیتونو کې د ټولو غوښتونکو لپاره یو شان ده. که چیرې تاسو د ماموریت د مشر (COM) د منظورۍ د ترلاسه کولو په پړاو کې یاست، تاسو د غوښتنلیک د طی مراحل د ځای بدلولو ته اړتیا نلرۍ. ستاسو د غوښتنلیک د طی مراحل ځای باید یوازې په لاندې حالاتو کې بدل شي:  

• که چیرې تاسو د ماموریت مشر (COM) د منظورۍ د ترلاسه کولو لپاره نوی غوښتنلیک لیږلی وي او منظورۍ ته منتظر یاست
• که چیرې تاسو د ماموریت مشر (COM) منظورۍ په اړه اقامه دعوی یا عرض کړی وي او د (COM) ځواب ته منتظر یاست

که چیرې تاسو د ماموریت مشر COM منظوري په اختیار کې لرۍ او د I-360 فورمې لیږلو ته اړ نه یاست، او یا که چیرې تاسو منظور شوې I-360 فورمه په اختیار کې لرۍ

د I-360 له منظورۍ وروسته، د غوښتنلیک د مراحلو د دوام پروسه په متحده ایالاتو کې دننه او بهر کسانو لپاره توپیر لري. د سند په دې برخه کې، له متحده ایالاتو څخه بهر کسانو لپاره پروسه توضیح کیږي. د هغو کسانو د غوښتنلیکونو د طی مراحل په باب د IRAP لارښوود وګورئ چې په متحده ایالاتو کې دننه استوګن دي.

که د ماموریت د مشر COM منظوري لرئ او د I-360 غوښتنلیک لیږلو ته اړتیا نلرۍ، او یا که تاسو د I-360 غوښتلیک منظوري ترلاسه کړې وي، تاسو کولی شۍ چې د ویزې ملي مرکز NVC سره اړیکه ونیسئ او غوښتنه وکړئ چې ستاسو کیس په هغه هیواد کې د متحده ایالاتو سفارت ته انتقال کړي چې تاسو پکې ژوند کوئ یا هغه هیواد ته چې تاسو ورته د تللو توان لرئ.

د DS-260 فورمې د ډکولو پرمهال، تاسو هغه سفارت مشخص کړئ چې تاسو ورته سفر کولی شئ یا په هغه هیواد کې سفارت مشخص کړئ چې تاسو اوس مهال پکې اوسیږئ.

څرنګه د کیس د انتقال غوښتنه وکړم

د بهرنیو چارو وزارت کولی شي ستاسو کیس یوازې هغو سفارتونو یا کنسلګریو ته انتقال کړي چې د کډوالۍ ویزې طی مراحل کوي. ځینې سفارتونه او کنسلګرۍ د کډوالۍ پرته نورې ویزې طی مراحل کوي چې تاسو سره مرسته کولی نشي.

د بهرنیو چارو وزارت تاسو سره بل هیواد ته د سفر او یاهم د مرکې لپاره بل هیواد ته د ویزې اخیستلو په برخه کې مرسته نشي کولی. 

د کیس د انتقال د درخواست لپاره، NVCSIV@state.gov ته بریښنالیک ولیږئ. په دې ایمیل کې باید لاندې معلومات شامل وي:

• ستاسو نوم
• ستاسو د زیږیدنې نیټه
• ستاسو د کیس شمیره
• هغه سفارت چې تاسو غواړۍ خپل کیس ورته انتقال کړئ

که چیرې ستاسو مرکه په کابل کې پلان شوې وه

که چیرې ستاسو مرکه په کابل کې د متحده ایالاتو په سفارت کې پلان شوې وه او تاسو مرکې ته حاضر شوي نه یاست، د متحده ایالاتو نږدې سفارت یا کنسلګرۍ ته چې تاسو ورته د سفر توان لرۍ، بریښنالیک ولیږئ. له سفارت یا کنسلګرۍ وغواړئ ترڅو ستاسو د مرکې ځای بدل کړي. 

تاسو باید په خپل بریښنالیک کې دا لاندې معلومات شامل کړئ:

• ستاسو نوم
• ستاسو د زیږیدنې نیټه
• ستاسو د کیس شمیره
• هغه اسناد چې ښیي ستاسو مرکه په سفارت کې پلان شوې وه

کیدي شي چې د سفارت یا کنسلګرۍ ځواب وځنډیږي. ستاسو د مرکې د وخت ټاکل هم کیدی شي اوونۍ یا میاشتې وځنډیږي.  

که چیرې ډاډه نه یاست چې سفارت یا کنسلګري د کډوالۍ ویزې طی مراحل کوي او که نه، او یا که چیرې د سم بریښنالیک په اړه ډاډه نه یاست، د بهرنیو چارو وزارت د سفارتونو له رسمي لست څخه ګټه واخلئ. په هغه هیواد کې چې استوګن یاست، د سفارت یا کنسلګرۍ ویب پاڼه پیدا کړئ. د سفارت یا کنسلګرۍ ویب پاڼه باید د ویزې د خدمتونو په باب یوه ځانګړې برخه ولري. د ویب پاڼې په همدې برخه کې توضیح کیږي چې په دې سفارت کې د کډوالۍ ویزې طی مراحل کیږي او که نه، او همدارنګه د اړیکې معلومات هم په همدې برخه کې وړاندې کیږي.  

اسلام آباد ته د کیس د انتقال په اړه معلومات: IslamabadAfghanSIV@state.gov
انقرې ته د کیس د انتقال په اړه معلومات: AnkaraIV@state.gov