دا مقاله وروستی ځل د 2026 کال د اکتوبر په 13 مه نیټه نوې شوې ده

لنډیز

ځینې هغه خلک چې د کډوالو په توګه په متحده ایالاتو کې بیا میشت شوي دي، د متحده ایالاتو د کډوالۍ او تابعیت د خدمتونو ادارې (USCIS) څخه د پوستې له لارې یو لیک ترلاسه کوي چې د "کډوالۍ حالت د لغو کیدو د ارادې خبرتیا" (“NOIT”) په نوم یادیږي. په دې مقاله کې تشریح شوي دي چې NOIT څه ده، ولې مهمه ده چې ژر تر ژره باید ورته ځواب ورکړل شي، او که تاسو دغه ډول لیک ترلاسه کړ، نو څه باید وکړئ. د متحده ایالاتو د دولت "د کډوالو د بیا ارزونې" اوسنیو پالیسیو په اړه او دا چې خلک ولې دا ډول لیکونه ترلاسه کوي، نور معلومات دلته ترلاسه کړئ. 

"د کډوالۍ د حالت د لغو کیدو د ارادې خبرتیا" (NOIT) څه ده؟

د "کډوالۍ حالت د لغو کیدو د ارادې خبرتیا" (“NOIT”) د USCIS ادارې له خوا یو لیک دی چې پکې ویل شوي دي چې دا اداره غواړي ستاسو د کډوالۍ حالت لغو کړي ځکه چې دوی باور لري کله چې تاسو متحده ایالاتو ته ورسیدئ، نو تاسو د "کډوال" له قانوني تعریف سره سمون نه درلود. په دې لیک کې تفصیلي توضیحات ورکړل شوي دي چې ولې USCIS کولی شي ستاسو د کډوالۍ حالت ختم کړي. دا توضیحات کیدی شي هغو څرګندونو ته اشاره وکړي چې تاسو متحده ایالاتو ته د راتګ لپاره د منظوریدلو مخکې، د کډوالۍ په اصلي مرکه کې ویلي وو. په دې کې کیدی شي ستاسو د کډوالۍ پخوانیو او اوسنیو غوښتنلیکونو کې معلومات، په ټولنیزو رسنیو لکه فیسبوک، انسټاګرام او نورو رسنیو کې ستاسو پوستونه شامل وي. 

په دې لیک کې همداراز ویل شوي دي چې که تاسو نه غواړئ چې USCIS اداره ستاسو د کډوالۍ حالت لغو کړي، نو تاسو څنګه کولی شئ دې لیک ته ځواب ورکړئ. دې خبرتیا ته د ځواب د سپارلو لپاره یوه ډیره لنډه موده ټاکل شوې ده. د 2026 کال د اکتوبر له 13 مې څخه راهیسې، تاسو یوازې لس (10) ورځې لرئ چې NOIT خبرتیا ته ځواب ورکړئ. که تاسو تر ټاکل شوې مودې خپل ځواب و نه لیږئ، USCIS اداره به ستاسو د کډوالۍ حالت لغو کړي. 

د کډوالۍ حالت د لغو کولو د ارادې خبرتیا NOIT به عموماً د پوستې له لارې ستاسو هغه وروستي آدرس ته ولیږل شي چې د USCIS ادارې په سیسټم کې موجود دی. ددې امکان هم شته چې NOIT خبرتیا ستاسو د بیامیشتیدنې ادارې یا هغه حقوقي دفتر ته د پوستې له لارې ولیږل شي چې ستاسو د ګرین کارت غوښتنلیک کې سپارلی وو، خو دا تضمیني نه دی. 

ما د کډوالۍ د حالت د لغو کیدو د ارادې خبرتیا NOIT ترلاسه کړه. اوس باید څه وکړم؟

که تاسو NOIT خبرتیا ترلاسه کړه، دا ډیره مهمه ده چې تاسو ددې خبرتیا د ترلاسه کولو په دلیل وپوهیږئ او پریکړه وکړئ چې څنګه غواړئ ځواب ورکړئ. تاسو چې هرڅه پریکړه کوئ، باید NOIT خبرتیا ته تر ټاکل شوې نیټې پورې USCIS ادارې ته ځواب ورکړئ. 

ژر تر ژره د مرستې غوښتنه وکړئ

د کډوالۍ حالت د لغو کیدو د ارادې خبرتیا NOIT به په انګلیسي ژبه وي. که تاسو انګلیسي په روانه توګه نشئ لوستلی، تاسو باید د خبرتیا د پوهیدو لپاره له یو باوري شخص څخه مرسته وغواړئ. 

موږ هم په کلکه سپارښتنه کوو چې تاسو ژر تر ژره د کډوالۍ یو وړ او باصلاحیته وکیل څخه د مشورې غوښتنه وکړئ. که تاسو دمخه د کډوالۍ یو وکیل لرئ، تاسو باید دا خبرتیا سمدستي له خپل وکیل سره شریکه کړئ. که تاسو تر اوسه د کډوالۍ وکیل نه لرئ، تاسو باید د بیا میشتیدنې په اداره کې خپلو ارتباطي کسانو سره اړیکه ونیسئ او د مرستې غوښتنه وکړئ. کیدی شي چې هغوی وکولی شي تاسو له باوري سرچینو سره ونښلوي. 

تاسو کولی شئ زموږ د چت بات په کارولو سره له IRAP څخه د مرستې غوښتنه وکړئ، خو موږ دا تضمین نشو ورکولی چې د مرستې د برابرولو لپاره به وکولی شو په خپل وخت تاسو ته ځواب درکړو. 

هغه دلیل پیدا کړئ چې USCIS ولې غواړي ستاسو د کډوالۍ حالت لغو کړي

د کډوالۍ د حالت د لغو کیدو د ارادې خبرتیا NOIT به تشریح کړي چې USCIS غواړي ستاسو د کډوالۍ حالت ختم کړي ځکه چې دا اداره باور لري کله چې تاسو متحده ایالاتو ته ورسیدئ، نو تاسو د "کډوال" له قانوني تعریف سره سمون نه درلود. د یوې یادونې په توګه، د متحده ایالاتو د قوانینو په رڼا کې، کډوال هغه څوک دی چې نشي کولی یا نه غواړي خپل اصلي هیواد ته بیرته ستون شي، ځکه چې یا پخوا ورته سخت زیان رسیدلی دی، او یا داسې د باور وړ دلیل شته چې له مخې یې کیدی شي په راتلونکي کې هم ورته زیان پیښ شي. دا زیان کیدی شي د نوموړي د نژاد، دین، ملیت، سیاسي نظر، یا بل کوم دلیل له امله وي چې هغه یې نشي بدلولی یا کیدی شي اړ نه وي چې بدل یې کړي. په دې تعریف کې هغه څوک نه دی شامل چې له همدې ځانګړتیاو له مخې یې نورو ته د جدي زیان په رسولو کې لاس درلود. 

ستاسو په NOIT خبرتیا کې به USCIS اداره تاسو ته ووایي چې دوی ولې فکر کوي چې متحده ایالاتو ته د رسیدو پرمهال تاسو له دې تعریف سره سمون نه درلود. د هغوی توضیحات کیدی شي مبهم وي. کیدی شي چې د هغوی څرګندونې حتی د کډوال له تعریف سره چې پورته یې یادوړنه وشوه، اړیکه ونلري. خو بیاهم ډیره مهمه ده چې د هغوی په څرګندونو وپوهیږئ ترڅو وکولی شئ مناسب ځواب ورکړئ. 

د بیلګې په توګه، کیدی شي دوی تاسو ته ووایي چې هغه معلومات چې تاسو د کډوالۍ په اصلي مرکه کې وړاندې کړي وو، د هغو نویو معلوماتو سره سمون نه لري چې اوس دوی سره موجود دي. په دې کې کیدی شي ستاسو د واده حالت او د کورنۍ جوړښت، ستاسو د سفر سوابق، ستاسو پوځي روزنې، یا ځانګړو سیاسي ډلو او خوځښتونو په اړه ستاسو نظرونه شامل وي. حتی که موضوع ستاسو د کډوالۍ له غوښتنې سره هیڅ ډول تړاو ونه لري، کیدی شي USCIS اداره ووایي چې ستاسو په څرګندونو کې دا توپیرونه په دې معنی دي چې تاسو په خپله اصلي مرکه کې "د باور وړ" نه وئ، نو له همدې امله دوی نشي کولی ستاسو د کډوالۍ د ادعا په اړه ستاسو په لومړنیو څرګندونو باور وکړي. 

شواهد راغونډ او خپل دلایل چمتو کړئ

تاسو کولی شئ د یوې نوې مرکې په غوښتلو سره او یا د یو تفصیلي لیکل شوي ځواب په لیږلو سره NOIT خبرتیا ته ځواب ورکړئ. په هره طریقه چې تاسو غواړئ دې خبرتیا ته ځواب ورکړئ، باید اضافي شواهد راغونډ کړئ او خپلې څرګندونې چمتو کړئ چې ولې د  USCIS ادارې پریکړه ناسمه ده. ددې کار د ترسره کولو پرمهال، تاسو باید دا لاندې ټکي پام کې ونیسئ.

• رښتیا ووایئ: مهمه ده چې ستاسو ځوابونه رښتیني وي، او هرډول پخوانۍ تیروتنې یا نیمګړتیاوې اصلاح کړئ، او ورسره دا وضاحت هم ورکړئ چې دا تیروتنې او نیمګړتیاوې ولې رامنځته شوې وې. په یاد ولرئ چې هر هغه څه چې تاسو یې اوس وړاندې کوئ یا هرډول نوې مرکې به په راتلونکي کې ستاسو د کډوالۍ د سوابقو یوه برخه وي. 

• هڅه وکړئ چې خپله قضیه را یاده کړئ: USCIS اداره ستاسو د قضیې ټولو اسنادو او ریکارډونو، او د نورو هغو ادارو اسنادو ته لاسرسی لري چې متحده ایالاتو ته ستاسو د کډوالۍ په پروسه کې ښکیل وو. د کډوالۍ د حالت د لغو کیدو د ارادې خبرتیا NOIT به په ځانګړې توګه همدې ریکارډونو، او ستاسو د پخوانیو مرکو یادښتونو ته اشاره کوي. کیدی شي له هغه وخته چې تاسو په دې مرکو کې ګډون کړی وو، څو کاله تیر شوي وي. که تاسو ډاډه نه یاست چې دقیقاً څه مو ویلي وو، او که ځانګړي جزییات مو په یاد نه دي، تاسو باید وضاحت ورکړئ چې ولې هغه معلومات په یاد راوړلی نشئ. 

• اضافي اسناد ومومئ: کیدی شي تاسو لپاره ګټوره وي چې د خپلو ویناو د ملاتړ په موخه، نور اسناد راغونډ کړئ. ټول هغه اسناد چې تاسو یې وړاندې کوئ باید په انګلیسي ژبه وي یا ورسره تصدیق شوې انګلیسي ژباړه ضمیمه وي. که تاسو اسناد له خپل لیکل شوي ځواب سره د پوستې له لارې لیږئ، د اسنادو اصلي نسخې مه لیږئ - یوازې د اسنادو کاپي ولیږئ. 

د کډوالۍ د حالت د لغو کیدو د ارادې خبرتیا NOIT ته په لیکلې بڼه او د پوستې له لارې ځواب ورکړئ

د متحده ایالاتو د تابعیت او کډوالۍ خدمتونو اداره USCIS به تاسو ته اجازه درکړي چې د مرکې غوښتنه وکړئ یا یو تفصیلي لیکل شوی ځواب ولیږئ او پکې وضاحت ورکړئ چې تاسو ولې فکر کوئ چې ددې ادارې پریکړه ناسمه ده. په هره طریقه چې تاسو دې خبرتیا ته ځواب ورکوئ، ‌ تاسو باید خپل ځواب هغه آدرس ته ولیږئ چې په NOIT خبرتیا کې لیکل شوی دی. 

بریښنالیک له لارې یا په آنلاین بڼه د ځواب لیږلو هیڅ کومه لاره نشته، او تاسو نشئ کولی خپل ځواب د USCIS سیمه ییز دفتر ته وسپارئ. 

په خپل لیکلي ځواب کې، تاسو کولی شئ لاندې هر یو کار ترسره کړئ: 

د مرکې غوښتنه وکړئ

تاسو کولی شئ له USCIS ادارې څخه د یوې نوې مرکې غوښتنه وکړئ، ترڅو په NOIT خبرتیا کې پر ذکر شويو مسایلو خبرې وشي. دا چې تاسو NOIT خبرتیا ته د ځواب ورکولو لپاره یوازې لس ورځې وخت لرئ، په ډیرو حالاتو کې ښه لاره دا ده چې یو ساده ځواب ولیږل شي او د مرکې غوښتنه وشي، نه دا چې بیړه وشي او مخکې له دې چې د ټولو شواهدو او حقایقو د راغونډولو لپاره کافي وخت موجود وي، یو تفصیلي ځواب چمتو شي. 

په لیکلې بڼه تشریح کړئ چې ولې ستاسو د کډوالۍ حالت باید ختم نه شي

که تاسو نه غواړئ چې د مرکې غوښتنه وکړئ، تاسو کولی شئ NOIT خبرتیا ته په لیکلې بڼه توضیحات ورکړئ چې ولې باید ستاسو د کډوالۍ حالت ختم نه شي. خو سره له دې هم، تاسو باید په پام کې ولرئ چې تاسو به ددې توضیحاتو د چمتو کولو لپاره یوازې څو ورځې وخت ولرئ، او کیدی شي دا تاسو لپاره کافي وخت نه وي چې یو داسې دقیق ځواب چمتو کړئ چې پکې د ټولو هغو مسایلو په اړه وضاحت ورکړل شوی وي چې په NOIT خبرتیا کې یې یادونه شوې ده او ستاسو ځواب باید په راتلونکي کې د اضافي ستونزو د رامینخته کیدو لامل نشي. 

د خپل ځواب د چمتو کولو او د وکیل د موندلو لپاره د ډیر وخت غوښتنه وکړئ

ستاسو د لیکلي ځواب د یوې برخې په توګه، تاسو کولی شئ  USCIS ادارې ته ووایئ چې تاسو د شواهدو د راغونډولو او د یو وکیل د پیدا کولو لپاره چې تاسو سره مرسته وکړي، ډیر وخت ته اړتیا لرئ. خو ددې احتمال نشته چې USCIS به دا غوښتنه ومني، نو ځکه مهمه ده چې NOIT خبرتیا ته په ځواب کې دا ستاسو یواځینی اقدام نه وي. تاسو لا هم باید د مرکې غوښتنه وکړئ یا لیکی تفصیلي ځواب چمتو کړئ.   

که تاسو یوازې غواړئ چې د مرکې غوښتنه وکړئ، یوه ساده بیلګه یا ټیمپلیټ چې تاسو یې ډکولی شئ دلته ترلاسه کړئ. تاسو همداراز کولی شئ د بیلګې یا ټیمپلیټ چاپ ته چمتو نسخه دلته ترلاسه کړئ. 

تر ټاکلې نیټې ځواب ورکړئ

دا خورا مهمه ده چې تاسو خپل ځواب د ټاکلې نیټې له پای ته رسیدو مخکې ولیږئ

ډیری خلک خپلې NOIT خبرتیاوې د پوستې له لارې ترلاسه کوي. که تاسو NOIT د پوستې له لارې ترلاسه کړې وي، ستاسو د ځواب ورکولو وروستۍ نیټه د خبرتیا له نیټې څخه 13 ورځې وروسته ده. د خپلې ځانګړې نیټې د محاسبه کولو لپاره، د NOIT خبرتیا په سر کې لیکل شوې نیټه وګورئ. له همدې نیټې څخه د اوونۍ پای ورځو او رسمي رخصتي ورځو په ګډون 13 ورځې وشمیرئ. که دیار لسمه ورځ د اوونۍ پای یا کومه رخصتي ورځ سره برابره وي، نو ستاسو د مهلت وروستۍ ورځ به راتلونکې کاري ورځ وي. 

USCIS اداره باید ستاسو ځواب په ټاکل شوې نیټه یا له دې نیټې څخه مخکې ترلاسه کړي؛ که نه نو، و به نه منل شي. هڅه وکړئ چې د ځواب ورکولو د مودې تر ډیرې وروستۍ شیبې پورې انتظار و نه کړئ، بلکې خپل ځواب مخکې له دې ولیږئ. په یاد ولرئ چې د پوستې له لارې لیږل شوی لیک ځینې وختونه په ناڅاپي توګه ځنډول کیږي، حتی که تاسو په هماغه ورځ کې د لیک د لیږلو پیسې هم ورکړې وي. موږ په کلکه سپارښتنه کوو چې داسې یو پوستي خدمت غوره کړئ چې د لیک ترلاسه کول تاییدوي، ترڅو تاسو په ټاکلې نیټه د ځواب د لیږلو ثبوت ولرئ.  

د کډوالۍ د حالت د لغو کیدو د ارادې خبرتیا NOIT ته له ځواب ورکولو وروسته څه پیښیږي؟

وروسته له دې چې NOIT خبرتیا ته په لیکلې بڼه ځواب ولیږل شو، ډیره مهمه ده چې هره ورځ خپل د لیکونو بکس وګورئ ترڅو ډاډ ترلاسه کړئ چې له USCIS ادارې څخه کوم ځواب له لاسه ورنکړئ. حتی که تاسو د کډوالۍ وکیل لرئ چې تاسو سره ستاسو د قضیې په اړه مرسته کوي، کیدی شي چې USCIS دا خبرتیاوې یوازې تاسو ته ولیږي. په دې خبرتیاو کې کیدی شي لاندې موارد شامل وي:

• د حضوري مرکې د ټاکل شوې نیټې خبرتیا

• "د کډوالۍ د حالت د ختمیدو وروستۍ" خبرتیا چې پکې تاسو ته خبر درکړل شوی دی چې USCIS ادارې وروستۍ پریکړه کړې ده چې ستاسو د کډوالۍ حالت لغو کړي. 

• هغه خبرتیا چې تاسو ته خبر درکوي چې ستاسو د ګرین کارت غوښتنلیک منظور شوی دی (دا عموماً په دې معنی دی چې دوی نور هڅه نه کوي چې ستاسو د کډوالۍ حالت ختم کړي)

• ستاسو قضیې پورې نورې اړوندې خبرتیاوې.

ددې اټکل کول ګران دی چې USCIS اداره به څومره ژر بیا تاسو سره اړیکه ونیسي. په ځینو حالاتو کې، خلکو میاشتې انتظار کړی خو هیڅ ډول تازه معلومات یې نه دي ترلاسه کړي. په ځینو نورو حالاتو کې، خلکو یوازې له څو اونیو وروسته، خبرتیاوې ترلاسه کړي دي.  

که د مرکې نیټه ترلاسه کړم، نو څه باید وکړم؟

د مرکې نیټه ښایي یوازې د څو ورځو په خبرتیا سره وټاکل شي، نوځکه تاسو باید د مرکې د چمتووالي لپاره ژر اقدام وکړئ. د امکان په صورت کې، تاسو باید یو وړ او باصلاحیه استازی پیدا کړئ چې په مرکه کې تاسو سره ګډون وکړي او/یا تاسو سره د مرکې لپاره په چمتووالي کې مرسته وکړي.  

دا مرکه کیدی شي د متحده ایالاتو د کډوالۍ هغې مرکې ته ورته وي چې تاسو دې هیواد ته له راتګ څخه مخکې پکې ګډون کړی وو، یا کیدی شي خورا محدود تمرکز ولري. کیدی شي چې تاسو څخه په متحده ایالاتو کې ستاسو د اوسني ژوند، د کډوالۍ پخوانیو یا اوسنیوغوښتنلیکونو یا د هغو نویو معلوماتو په اړه پوښتنې وشي چې د متحده ایالاتو دولت ستاسو په اړه ترلاسه کړي دي. مرکه ښایي څو ساعته وخت ونیسي. 

کډوالو سره د مرستې نړیواله پروژه IRAP د کډوالو د بیا ارزونې د مرکې په اړه ځینې عمومي لارښوونې چمتو کړي چې دلته ترلاسه کیدی شي. په یاد ولرئ چې USCIS اداره به یوازې پر هغو موضوعاتو تمرکز کوي چې په NOIT خبرتیا کې یې یادونه شوې ده. دا ډیره مهمه ده چې تاسو یو پلان ولرئ او د همدې پلان له مخې وضاحت ورکړئ چې ددې موضوعاتو په اړه د USCIS څرګندونې ولې ناسمې دي. تاسو همداراز باید ددې موضوعاتو په اړه نور اسناد او شواهد ځان سره مرکې ته راوړئ. 

که تاسو یا ستاسو وکیل پخوا د کډوالۍ قضیې د دوسیې د یوې کاپي د ترلاسه کولو لپاره د معلوماتو د آزادۍ قانون FOIA غوښتنه سپارلې وي، تاسو باید دا دوسیه په دقت سره وګورئ ترڅو وپوهیږئ چې ستاسو په اسنادو او ریکارډونو کې ستاسو او ستاسو د قضیې په اړه څه ویل شوي دي. دا هم کیدی شي مرکې ته د چمتووالي لپاره ډیر ګټور وي.

ما د کډوالۍ د حالت د لغو کیدو وروستۍ خبرتیا ترلاسه کړه. ددې معنی څه ده؟

ځینو کډوالو چې د کډوالۍ د حالت د لغو کیدو د ارادې خبرتیا (NOIT) یې ترلاسه کړې ده، وروسته یو بل لیک ترلاسه کوي چې د کډوالۍ د حالت د ختمیدو وروستۍ خبرتیا په نوم یادیږي. که تاسو دا خبرتیا ترلاسه کړه نو پکې به وضاحت ورکړل شوی وي چې USCIS ادارې ستاسو د کډوالۍ د حالت د ختمولو په اړه وروستۍ پریکړه کړې ده. په دې لیک کې به ویل شوي وي چې تاسو نور یو کډوال نه ګڼل کیږئ.  

که تاسو د وروستۍ پریکړې خبرتیا ترلاسه کړې وي، دا په دې معنی ده چې تاسو نور په متحده ایالاتو کې د کډوالۍ قانوني حالت نه لرئ، او له همدې امله تاسو نور د کار کولو اجازه هم نه لرئ. ستاسو میرمن/خاوند او ماشومان چې ستاسو د قضیې د یوې برخې په توګه متحده ایالاتو ته راغلي دي، هغوی به هم سمدستي د کډوالۍ حالت او د کار کولو اجازه له لاسه ورکړي.  

شا او خوا په همدې وخت کې چې تاسو د کډوالۍ د حالت د ختمیدو وروستۍ خبرتیا ترلاسه کوئ، تاسو به همداراز د "حاضریدلو خبرتیا" په نوم یو بل سند ترلاسه کړئ. په دې سند کې به وضاحت ورکړل شوی وي چې دولت غواړي د کډوالۍ محکمې د پروسې له لارې تاسو له هیواد څخه وباسي. په دې خبرتیا کې به ستاسو د محکمې د لومړۍ غونډې نیټه، وخت او ځای شامل وي. دا معلومات معمولاً د پاڼې لاندینۍ برخې ته نږدې لیکل شوې وي. که په دې خبرتیا کې د محکمې نیټه ذکر شوې وي، ډیره مهمه ده چې تاسو په ټاکل شوې ورځ او وخت محکمې ته حاضر شئ. 

که تاسو د کډوالۍ حالت د لغو کیدو وروستۍ خبرتیا او/یا د کډوالۍ په محکمه کې د حاضریدو خبرتیا ترلاسه کړې وي، تاسو باید د امکان په صورت کې د کډوالۍ یو وړ او با صلاحیته وکیل سره مشوره وکړئ. تاسو کولی شئ د مرستې د ترلاسه کولو لپاره IRAP سره زموږ د چت بات له لارې اړیکه ونیسئ. تاسو کولی شئ د وړیا او کم لګښته وکیلانو نوملړ دلته او د شخصي وکیلانو نوملړ دلته ترلاسه کړئ. IRAP نشي کولی چې په دې نوملړ کې د شاملو وکیلانو له خوا د وړاندې کیدونکو خدمتونو د کیفیت تضمین وکړي.  

نور معلومات او سرچینې

که تاسو یو کډوال یاست او د کډوالۍ د حالت د لغو کیدو د ارادې خبرتیا NOIT په اړه شخصي مشوره غواړئ، باید د کډوالۍ یو وړ او باصلاحیته وکیل سره اړیکه ونیسئ. 

• تاسو کولی شئ زموږ د چت بات په کارولو سره له IRAP څخه د مرستې غوښتنه وکړئ.

• تاسو کولی شئ د وړیا او کم لګښته وکیلانو نوملړ دلته او د شخصي وکیلانو نوملړ دلته ترلاسه کړئ. IRAP نشي کولی چې په دې نوملړ کې د شاملو وکیلانو له خوا د وړاندې کیدونکو خدمتونو د کیفیت تضمین وکړي.