Kuondolewa kwa haraka ni nini?
Nini kimebadilika? Kwa nini mabadiliko haya ni muhimu?
Maswali ya Kawaida Kuhusu Kuondolewa kwa Haraka
Ninawezaje kuiomba serikali ya Marekani iniruhusu kuomba hifadhi?
Mchakato wa mahojiano unafanyaje kazi?
Je, nitazuiliwa (kushikiliwa kizuizini) ikiwa nitawekwa kwenye mchakato wa kuondolewa kwa haraka?
Je, naweza kuwa na wakili katika mchakato wa kuondolewa kwa haraka?
Ninawezaje kutoka kwenye mchakato wa kuondolewa kwa haraka? Je, naweza kumuona jaji?
Ikiwa nina wasiwasi kuhusu mchakato wa kuondolewa kwa haraka, ninaweza kufanya nini?
Taarifa za Ziada na Rasilimali
Muhtasari
Makala hii inaelezea maana ya kuondolewa kwa haraka na ni nani anayeweza kuathiriwa. Inatoa taarifa kuhusu juhudi za Trump za kupanua mchakato wa kuondolewa kwa haraka mnamo Januari 2025.
Taarifa muhimu katika makala hii ni pamoja na:
- Maelezo kuhusu mchakato wa kuondolewa kwa haraka,
- Watu wanaoweza kuwekwa kwenye mchakato huo,
- Nini kinachotokea unapokuwa katika mchakato huo, na
- Wakati mtu anaweza kutoka kwenye mchakato huo ili kujaribu kubaki Marekani.
Kuondolewa kwa haraka ni nini?
Kuondolewa kwa haraka ni mchakato unaoruhusu serikali ya Marekani kuhamisha watu fulani kwa haraka sana. Kwa mfano, kuondolewa kwa haraka kumeendelea kutumiwa kwa muda mrefu kuwaondoa haraka watu waliovuka mpaka wa Marekani bila ruhusa na wakaingia mikononi mwa maafisa wa uhamiaji karibu na mpaka.
Katika mchakato wa kuondolewa kwa haraka, huna haki ya kumuona jaji. Badala yake, afisa mwingine wa serikali anaweza kutoa agizo la kukufukuza bila kukupa nafasi ya kuwasilisha kesi yako mahakamani. Mara tu agizo hilo linapotolewa, unaweza kurejeshwa katika nchi yako ya uraia. Kwa baadhi ya mataifa, unaweza pia kupelekwa katika nchi nyingine, kama vile Mexico
Nimesikia kuwa mchakato huu umebadilika chini ya Trump. Sera mpya kuhusu kuondolewa kwa haraka ni zipi? Nitajuaje kama zinaniathiri?
Kuanzia Januari 23, 2025, serikali inasema kuwa watu ambao hawakuwa na ruhusa ya kuingia Marekani kwa kutumia parole au visa, na ambao hawawezi kuthibitisha kuwa wamekuwa Marekani kwa zaidi ya miaka miwili, wanaweza kuwekwa kwenye mchakato wa kuondolewa kwa haraka. Watu wanaokwenda kwenye bandari rasmi za kuingia na kuomba kuingia Marekani pia bado wanaweza kuwekwa kwenye mchakato huu.
Ikiwa uliingia Marekani bila visa au ruhusa nyingine ya kisheria ndani ya miaka miwili iliyopita, unaweza kuwekwa kwenye mchakato wa kuondolewa kwa haraka. Kuanzia Januari 23, 2025, serikali ya Marekani imesema kuwa itajaribu kuwaweka watu kwenye mchakato huu hata kama waliingia Marekani kwa parole. Kulingana na tunavyoelewa, serikali sasa imewaagiza maafisa wa uhamiaji wa Marekani kukagua parole ya watu waliopata ruhusa hiyo chini ya baadhi ya programu za parole na kuamua ikiwa wanaweza kuwekwa kwenye mchakato wa kuondolewa kwa haraka.
Serikali imesema kuwa sera hii inawahusu watu waliopata miadi kupitia CBP One, pamoja na wale waliopokea parole kama raia wa Cuba, Haiti, Nicaragua, au Venezuela. Inaweza pia kutumika kwa watu wengine.
Kwa wale walio katika hali hii na tayari wana kesi ya hifadhi mbele ya mahakama ya uhamiaji, serikali ya Marekani inaweza kujaribu kukomesha kesi yao mahakamani na badala yake kuwaweka kwenye mchakato wa kuondolewa kwa haraka. Serikali inasema kuwa wanataka kutumia sera hii zaidi dhidi ya watu waliopata parole mwaka mmoja au zaidi uliopita na ambao bado hawajaomba hifadhi.
Nini kimebadilika? Kwa nini mabadiliko haya ni muhimu?
Kabla ya mabadiliko haya, watu waliokuwa tayari ndani ya Marekani wangeweza tu kuwekwa kwenye mchakato wa kuondolewa kwa haraka ikiwa wangekamatwa na serikali ya Marekani ndani ya umbali wa maili 100 kutoka mpakani na ndani ya siku 14 baada ya kuingia nchini.
Sasa, ikiwa uliingia Marekani bila visa au ruhusa nyingine ya kisheria ndani ya miaka miwili iliyopita, unaweza kuwekwa kwenye mchakato wa kuondolewa kwa haraka, bila kujali uko umbali gani kutoka mpakani. Hii inamaanisha kuwa watu wengi zaidi walioko ndani ya Marekani sasa wanaweza kuwekwa kwenye mchakato huu.
Maswali ya Kawaida Kuhusu Kuondolewa kwa Haraka
Ikiwa nimewekwa kwenye mchakato wa kuondolewa kwa haraka, bado naweza kuomba hifadhi au aina nyingine ya ruhusa ya kukaa Marekani?
Katika mchakato wa kuondolewa kwa haraka, unaweza tu kuanza utaratibu wa kuangalia ikiwa unaruhusiwa kuomba hifadhi au ruhusa nyingine ya kukaa Marekani. Ikiwa uko kwenye mchakato wa kuondolewa kwa haraka, huwezi kuomba hifadhi hadi serikali ya Marekani iamue kuwa unaruhusiwa kufanya hivyo.
Ninawezaje kuiomba serikali ya Marekani iniruhusu kuomba hifadhi?
Ikiwa unaogopa kurudi katika nchi yako, na ukimwambia afisa wa serikali ya Marekani kuwa unaogopa, unapaswa kupewa mahojiano. Kile utakachosema katika mahojiano hayo kitasaidia serikali ya Marekani kuamua ikiwa unapaswa kuruhusiwa kuomba hifadhi au aina nyingine ya ruhusa ya kukaa Marekani.
Hata hivyo, ni muhimu sana kukumbuka kuwa maafisa wa uhamiaji hawalazimiki kukuuliza ikiwa unaogopa au ikiwa unataka kuomba hifadhi. Hii inamaanisha kuwa huenda wasikuulize kabisa. Kwa sababu hiyo, ikiwa unaogopa kurudi, lazima uwaeleze maafisa wa Marekani mapema na mara nyingi iwezekanavyo. Unaweza kuwaambia watu zaidi ya mmoja, na unaweza kuwaambia zaidi ya mara moja.
Ni muhimu pia kujua kwamba ikiwa uko na familia yako, mnaweza kutenganishwa. Kwa hivyo, ikiwa unaogopa kurudi katika nchi yako, hakikisha kuwa kila mtu katika familia yako anafahamu jinsi mchakato huu unavyofanya kazi na anajua kuwa wanapaswa kuwaeleza maafisa wa uhamiaji wa Marekani sababu za hofu yao haraka iwezekanavyo na mara nyingi iwezekanavyo. Hii inawahusu hata watoto.
Mchakato wa mahojiano unafanyaje kazi?
Ikiwa utamwambia afisa wa uhamiaji wa Marekani kuwa unaogopa kurudi nyumbani, unapaswa kupewa mahojiano. Kulingana na hali yako, mahojiano haya yanaweza kuitwa "mahojiano ya hofu inayokubalika" au "mahojiano ya hofu yenye msingi." Jambo muhimu kujua kuhusu mahojiano haya ni kwamba afisa wa uhamiaji anajaribu kuelewa kwa nini unaogopa kurudi nyumbani na ikiwa hofu hiyo inamaanisha unapaswa kuruhusiwa kuomba kubaki Marekani.
Kumbuka kuwa mahojiano haya hayakupi hifadhi moja kwa moja. mIkiwa utayapita, yanakupa tu nafasi ya kuomba hifadhi.
Unaweza kupata maelezo zaidi kuhusu mahojiano haya hapa.
Je, nitazuiliwa (kushikiliwa kizuizini) ikiwa nitawekwa kwenye mchakato wa kuondolewa kwa haraka?
Ndio, unaweza kuzuiliwa, na kuna uwezekano mkubwa utazuiliwa. Watu wengi wanaowekwa kwenye mchakato wa kuondolewa kwa haraka hushikiliwa kizuizini wakati maafisa wa Marekani wanaanza mchakato wa kuwafukuza nchini na/au wakati wa mahojiano yao. Kuzuiliwa kunamaanisha kushikiliwa kizuizini.
Je, naweza kuwa na wakili katika mchakato wa kuondolewa kwa haraka?
Ndio, unaruhusiwa kuwa na wakili. Mchakato wa kuondolewa kwa haraka hufanyika kwa kasi, kwa hivyo ni muhimu kuwasiliana na wakili mara moja.
Ikiwa umezuiliwa, unayo haki ya kuomba wakili na haki ya kupiga simu ili kujaribu kumpata wakili. (Hii inamaanisha kuwa maafisa hawawezi kukuzuia kuomba wakili, wala hawawezi kukuzuia kupiga simu ili kumpata.)
Ni muhimu kuto saini nyaraka ambazo huelewi. Ikiwa wewe ni mtu ambaye huenda ukawa katika hatari ya kuwekwa kwenye mchakato wa kuondolewa kwa haraka, inaweza kuwa msaada kuzungumza na wakili kabla ya kuwa na mkutano wowote na maafisa wa sheria.
Ninawezaje kutoka kwenye mchakato wa kuondolewa kwa haraka? Je, naweza kumuona jaji?
Ikiwa utapita mahojiano ya hofu inayokubalika au hofu yenye msingi, utawekwa kwenye mchakato wa mahakama ya uhamiaji. Hii inamaanisha utapata nafasi ya kuwasilisha kesi yako mbele ya jaji wa uhamiaji.
Ikiwa hutawaambia maafisa wa uhamiaji wa Marekani kuhusu hofu yako ya kurudi katika nchi yako au hupati uamuzi chanya katika mahojiano ya hofu inayokubalika au yenye msingi, maafisa wa uhamiaji wa Marekani wanaweza kukufukuza haraka sana bila kukupeleka mbele ya jaji.
Ikiwa utatoka kwenye mchakato wa kuondolewa kwa haraka na kuingia kwenye mahakama ya uhamiaji, bado unaweza kulazimika kubaki kizuizini hadi kesi yako itakapomalizika.
Ikiwa nina wasiwasi kuhusu mchakato wa kuondolewa kwa haraka, ninaweza kufanya nini?
Mtu yeyote ambaye hana hadhi ya kisheria ya kudumu nchini Marekani na aliyeingia chini ya miaka miwili iliyopita anapaswa kushauriana na wakili wa uhamiaji kuhusu hali yake binafsi ikiwa inawezekana. Hatufahamu kwa uhakika jinsi maafisa wa uhamiaji wa Marekani watakavyotekeleza sera hizi mpya.
Ikiwa una wasiwasi kuhusu kuondolewa kwa haraka, kuna mambo kadhaa ambayo unaweza kutaka kuwa nayo kila wakati iwapo utasimamishwa na maafisa wa sheria. Haya ni pamoja na:
-
Ikiwa una hadhi ya kisheria nchini Marekani:
- Ushahidi wa hadhi yako ya kisheria, kama vile nyaraka zinazoonyesha hali yako ya uhamiaji au uraia.
Ikiwa una kesi inayoendelea mahakamani au ombi la uhamiaji:
- Nyaraka au uthibitisho mwingine unaoonyesha kuwa una kesi au ombi linaloendelea. Kwa bahati mbaya, serikali bado inaweza kujaribu kukuweka kwenye mchakato wa kuondolewa kwa haraka..
Ikiwa uliingia nchini zaidi ya miaka miwili iliyopita:
- Nyaraka zinazoonyesha muda uliokaa Marekani. Hizi zinaweza kujumuisha tiketi za ndege, vitambulisho vya serikali ya jimbo, kadi za maktaba, barua zilizo na muhuri wa posta zenye jina lako na anwani yako, rekodi za shule, mikataba ya upangaji nyumba, na hati zingine zinazoonyesha kuwa umeishi Marekani kwa zaidi ya miaka miwili.
Kumbuka kuwa huna wajibu wa kujibu maswali kuhusu hali yako ya uhamiaji – tazama hapa kwa maelezo zaidi kuhusu haki zako ikiwa utaulizwa maswali na maafisa wa uhamiaji.
Taarifa za Ziada na Rasilimali
NILC Know Your Rights Expedited Removal Expansion
National Immigrant Justice Center: Know Your Rights if You Encounter ICE
|
Mradi wa Kimataifa wa Msaada kwa Wakimbizi (IRAP) unatoa msaada wa kisheria bila malipo kwa baadhi ya wakimbizi na watu waliohamishwa makazi yao.
IRAP huamua kuwasaidia watu kulingana na mahitaji yao na kustahiki hali ya uhamiaji. IRAP haiamui kusaidia watu kulingana na vigezo vyovyote vya kijamii au kisiasa au kidini. Tovuti hii inatoa maelezo ya jumla kuhusu taratibu za kisheria zinazopatikana kwa baadhi ya wakimbizi. Haimaanishi kuwa ushauri wa kisheria kwa maombi ya mtu binafsi. Mahitaji yanaweza kubadilika. Daima angalia mahitaji ya sasa kutoka kwa serikali au wakala anayeamua ombi lako. Ikiwa uko katika dharura ya mkimbizi, tunapendekeza kwamba uwasiliane na ofisi ya UNHCR katika nchi unayoishi. |