REMAK: Depi 20 janvye 2025, gouvènman ameriken an te fè anpil chanjman nan politik li yo konsènan imigrasyon ak fwontyè Etazini-Meksik la. Ou ka jwenn plis enfòmasyon sou chanjman jeneral sa yo isit la.

Enfòmasyon ki anba a te ekri pou moun ki te antre Ozetazini apre yo te fin pran yon randevou atravè aplikasyon CBP One anvan janvye 2025. Gen kèk ladan yo ki ka toujou enpòtan pou ou, men nou gen plis konsèy pou ou nan atik ki isit la.

Atik sa a gen enfòmasyon sou sa k pral rive apre yo fin lage w Ozetazini, oswa apre w fin “jwenn libète pwovizwa” nan peyi Etazini sou fwontyè a.

Kisa k ap pase si yo lage w Ozetazini apre yon randevou nan yon pò dantre?

Pifò moun ki antre Ozetazini ak yon randevou CBP, yo kite yo antre Ozetazini ak yon estati yo rele libète pwovizwa epi ak yon avi ke yo bezwen parèt nan pwosedi tribinal imigrasyon. Sa vle di ke gouvènman ameriken an ap eseye depòte yo.

Ki sa sa vle di pou gen Libète Pwovizwa?

Libète pwovizwa pèmèt moun ki pa sitwayen ameriken viv Ozetazini pou yon kantite tan tanporè epi fiks (men pa pou tout tan).

Sepandan, li enpòtan anpil pou w konnen libète pwovizwa pa ba w yon estati pèmanan Ozetazini. Estati pèmanan vle di ke ou gen dwa viv legalman nan peyi Etazini nèt ale. Sa vle di ke si ou te jwenn libète pwovizwa men ou vle rete Ozetazini pou yon tan ki long ou dwe chèche yon fason diferan pou rete Ozetazini nèt ale. Gen kèk lòt fason pou rive fè sa, tankou aplike pou azil. 

Men kèk bagay enpòtan ou dwe konnen sou libète pwovizwa:

• Si w jwenn libète pwovizwa, ou kapab aplike pou yon pèmi travay. Yon pèmi travay pèmèt ou travay legalman Ozetazini. Pèmi travay ou a fini lè libète pwovizwa w la fini. Fòm pou aplike pou pèmi sa a rele "I-765", epi ou kapab ranpli li sou entènèt (sèvi ak fòm sa a) oswa voye li pa lapòs.

• Anvan libète pwovizwa a fini – epi pi bonè posib – anjeneral ou kapab benefisye lè w pale ak yon avoka. Li kapab itil pou eseye aplike rapid pou yon estati pèmanan kelkonk si ou kalifye.

• Pafwa ou kapab jwenn yon nouvo dat libète pwovizwa lè premye dat la fini, men anjeneral li pa posib pou moun ki resevwa libète pwovizwa nan yon randevou CBP sou fwontyè Etazini ak Meksik.

• Pafwa ofisye imigrasyon yo bay enfòmasyon sou peryòd libète pwovizwa a sou yon papye. Si yo pa bay papye sa a, anjeneral ou ka konnen konbyen tan peryòd libète pwovizwa a ap dire lè w tcheke sou entènèt.

Kisa k ap fèt apre ou fin jwenn libète pwovizwa pou antre Ozetazini?

Jwenn libète pwovizwa pa vle di ke dosye ou fèmen. Sa vle di sèlman ke ou gen dwa rete Ozetazini tanporèman. Pou w kapab rete Ozetazini legalman, ou dwe jwenn yon lòt kalite estati pèmanan, tankou azil.

Si ou jwenn libète pwovizwa sou fwontyè Etazini-Meksik la, anjeneral yo mete w nan pwosedi tribinal imigrasyon. Sa vle di gouvènman ameriken an ap eseye depòte w soti nan peyi Etazini. Li posib pou evite depòtasyon si ou kalifye pou kèk lòt estati imigrasyon nan peyi Etazini. Pwosesis sa a kapab konplike anpil, kidonk li bon pou jwenn yon avoka imigrasyon pi vit ke posib apre yo fin ba w libète pwovizwa a. Ou ka jwenn plis enfòmasyon sou kijan pou jwenn yon avoka imigrasyon pi lwen nan atik sa a.

Kesyon yo poze souvan sou Libète Pwovizwa

Èske Libète Pwovizwa dire nèt ale? Ki lè li fini? Èske li posib pou renouvle l?

• Libète pwovizwa pa dire nèt ale. Li gen yon dat ekspirasyon. Li jis vle di ke ou kapab rete nan peyi Etazini pou yon ti tan.
• Ofisye ki ba w libète pwovizwa a deside dat fen libète sa a. Ou kapab jwenn dat fen libète pwovizwa w la sou yon moso papye gouvènman an ba w, oswa sou tenm ki nan paspò w la, oswa sou sit entènèt ofisyèl I-94 la.
• Malerezman, pa gen yon sèl repons pou kesyon si ou kapab renouvle libète pwovizwa a. Gen kèk kalite libète pwovizwa renouvlab, kèk kalite ki paka renouvle, epi kèk kalite ki sipoze renouvlab men ki pa janm rive renouvle vre. Règleman yo chanje rapid tou.

Si mwen te gen yon entèvyou krent kredib sou fwontyè a, epi lè sa a mwen jwenn libète pwovizwa Ozetazini, èske sa vle di mwen gen azil?

• Non. Entèvyou sa a se jis premye tès pou wè si ou gen dwa aplike pou azil. Pase tès la PA vle di ke ou deja gen azil. Sa pa vle di nonplis ke ou te aplike pou azil.
• Si ou pase entèvyou krent kredib la, ou kapab aplike pou azil. Men, ou toujou oblije voye aplikasyon an ale, swiv dosye a, epi genyen li nan fen an pou jwenn azil.
• Si ou pa t jwenn yon entèvyou krent  kredib, sa PA vle di ke ou pa kapab aplike pou azil. Si ou pè retounen nan peyi w, ou kapab toujou aplike pou azil nan yon ane apre ou antre Ozetazini.

Èske moun ki gen Libète pwovizwa kapab mennen pitit yo Ozetazini?

• Pi souvan, non.
• Anjeneral ou oblije aplike epi jwenn yon kalite estati, tankou azil, pou mennen fanmi ou Ozetazini. Sèten lwa pèmèt ou rete Ozetazini nèt ale. Pwosesis pou jwenn yon estati pèmanan ki kalifye epi mennen fanmi Ozetazini anjeneral pran plizyè ane.
• Sepandan, gen yon pwogram ki rele pwogram Minè Amerik Santral (CAM) ki kapab aplike pou moun ki soti nan peyi Gwatemala, Ondiras, oswa El Salvador. Ou kapab elijib pou aplike pou CAM si:

1. Ou soti nan youn nan peyi sa yo;
2. Ou gen youn oswa plizyè timoun ki poko marye ki poko gen 21 lane nan peyi w; epi
3. Gen libète pwovizwa pou youn oswa plizyè lane.

https://support.iraplegalinfo.org/hc/en-us/articles/4404258709908-I-want-to-apply-for-the-CAM-Program

Jwenn yon avi pou parèt devan yon jij.

Apre w fin jwenn libète pwovizwa sou fwontyè Etazini-Meksik la, anjeneral w ap resevwa sa yo rele yon “Notice to Appear” (NTA). Yon Avi pou parèt devam yon jij se yon dokiman ki kòmanse pwosesis de bagay:

1. Gouvènman an ap eseye depòte w atravè pwosedi tribinal imigrasyon epi
2. W ap eseye pwouve ou gen dwa pou w rete Ozetazini.
   

The NTA form has a lot of very important information on it. However, that information can also change very quickly. Some of that information includes:

Fòm NTA a gen anpil enfòmasyon trè enpòtan ladan li. Sepandan, enfòmasyon sa a kapab chanje tou rapid vit. Kèk nan enfòmasyon sa yo gen ladan yo:

• Yon nimewo ki gen nèf chif yo rele “Nimewo Fichye” oswa “ Nimewo A”. Nimewo sa a rete avèk ou nan tout aplikasyon ou ak pwosedi ou yo nan peyi Etazini epi li se yon fason pou idantifye ou. Pou rezon sa a, li enpòtan anpil pou w memorize nimewo sa a epi pou w kenbe l an sekirite, paske l ap ede w kenbe dosye imigrasyon w la.

• Yon avi ki endike kilè ak ki kote ou gen premye dat tribinal ou. Anjeneral yo make li tou pre anba paj la. Si gen yon dat tribinal ki make, li enpòtan anpil pou ale nan tribinal nan jou ak lè sa a. Pafwa pap gen yon dat, men sa PA vle di ke ou pa gen pou w ale tribinal. W ap toujou gen yon dat tribinal.

Si w resevwa yon NTA ki pa gen yon dat tribinal, ou ka konnen ki lè w gen odyans ou lè w rele nan 1-800-898-7180 ​​oswa lè w gade nan sitwèb tribinal imigrasyon an. Yon mesaj otomatik pral reponn nimewo telefòn la kote ou dwe antre "Nimewo A" (sa yo rele A Number) ou a. L ap fè w konnen kilè w gen dat tribinal (si gen yon dat pou tribinal). Li t ap yon bon lide pou w rele nimewo sa a apeprè yon fwa pa semèn nan ka enfòmasyon yo t a chanje. Pafwa pa gen okenn dosye pou ka w la. Sa vle di ke gouvènman an poko depoze dosye w la. Malerezman, ou toujou bezwen parèt nan dat ak lè ki endike nan NTA ou a - gouvènman an ka depoze avi a ala dènyè minit,

Pou jwenn sitwèb tribinal imigrasyon an, chèche “EOIR automated case information” oswa ale sou lyen sa a: https://acis.eoir.justice.gov/en/caseInformation/

Kisa sa vle di lè w resevwa yon "Lòd pou yo lage w sou kondisyon" ak/oswa yon "lòd sipèvizyon"

Pafwa, yo ba w sa yo rele yon "Lòd pou lage sou kondisyon" (Order of Release on Recognizance) oswa yon "Lòd sipèvizyon." Sa yo se fòm komen ki soti nan ICE (Imigrasyon ak Ranfòsman Ladwàn) ki akòde ou libète sou kondisyon epi libere ou soti nan detansyon, men sèlman sou sèten kondisyon. Anjeneral, kondisyon sa yo endike sou fòm "Lòd pou lage" oswa "Lòd pou sipèvizyon"; Yon moun ki gen yon lòd anjeneral dwe jwenn pèmisyon pou deplase anvan l deplase kite kay kote li ye a. Ou dwe ale nan biwo lokal ICE yo pou w “fè yon rapò” pou gouvènman ameriken an ka verifye kote w ye a epi jwenn ou si sa nesesè.  Li enpòtan pou swiv kondisyon ki nan lòd sa yo. Si ou resevwa lòd la epi ou pa swiv sa li di, yo kapab arete w.

Men kèk bagay enpòtan ou dwe konnen sou lòd sa yo:

• W ap resevwa yon bagay ki rele yon Dat Enskripsyon ICE. Sa a pral sou menm fòm ak Lòd pou lage sou kondisyon (Order of Release on Recognizance) oswa Lòd pou sipèvizyon (Order of Supervision).
  • Yon Dat Enskripsyon ICE PA menm ak yon Dat Tribinal Imigrasyon, menm si se nan menm jou a. Li se yon randevou separe ki souvan nan yon lòt kote ak diferan moun.
• Yon dat tribinal imigrasyon gen yon jij ki anjeneral abiye fòmèlman epi ki pral parèt swa an pèsòn oswa sou yon ekran videyo. Yon Dat Enskripsyon ICE pa gen yon jij.
• Yo itilize anrejistreman (Check-Ins) ICE yo pou montre ke w ap suiv kondisyon (règleman) liberasyon w apre w soti nan detansyon.
  • Se yon fason pou gouvènman ameriken an suiv tras de sa w ap fè pandan yo pèmèt ou soti nan detansyon.
•  Yon moun ki resevwa enstriksyon pou enskripsyon an ta dwe swiv yo.
  • ICE kapab mete yon moun ki rate yon anrejistreman (check-in) sou yon lis "fijitif" epi kenbe yo si yo jwenn yo. ICE pa toujou fè sa.
  • Souvan, si ou rate anrejistreman w lan pou yon rezon valab, ICE ap kite ou tcheke pwochen fwa ou ale nan kote anrejistreman an. Lè sa a, yo pral ba w yon nouvo dat pou pwochen check-in. Li pi bon pou w jwenn yon avoka ki ede w lè w rate yon check-in.
    • Egzanp de bon rezon pou manke yon chèk-in: si li te enposib pou antre nan bilding nan, ou te gen yon ijans medikal, ou pa t konnen ou te gen yon check-in, elatriye.

Kesyon yo poze souvan sou dat tribinal yo

1. E si w deplase al rete byen lwen tribinal kote w gen dat odyans tribinal la?
2. Si w demenaje, oswa adrès ou chanje, ou dwe fè tribinal la konnen nan senk jou apre w fin deplase. Ou dwe fè sa menmsi nouvo adrès ou a pre ak ansyen adrès ou a.
3. Ou kapab fè tribinal la konnen ke w deplase lè w chèche “Fòm Chanjman Adrès EOIR” (Change of Address Form EOIR) nan Google oswa lè w itilize lyen sa a: https://respondentaccess.eoir.justice.gov/en/forms/eoir33ic/. 
4. Lè ou fè tribinal la konnen nan ki nouvo adrès ou rete, tribinal la ka chanje kote odyans lan pral fèt. Li ka deplase nan yon tribinal ki pi pre nouvo adrès la. 

Kisa k ap pase si w rate yon dat nan tribinal?

1. Si w pa ale nan tribinal alè jou odyans lan, w ap resevwa yon lòd depòtasyon. Sa vle di gouvènman an ka depòte w nenpòt ki lè. Sa pa toujou vle di ou pral depòte touswit.
2. Lè w reyalize ou rate dat tribinal la oswa ou gen yon lòd depòtasyon, ou ta dwe jwenn yon avoka pi vit posib pou eseye relouvri dosye a.

Èske yon odyans tribinal kapab chanje dat?

1. 1. Wi, dat odyans tribinal yo kapab chanje. Ou ta dwe tcheke liy dirèk telefòn tribinal imigrasyon an 1-800-898-7180 ​​oswa sitwèb tribinal imigrasyon an (enfòmasyon dosye EOIR otomatik) yon fwa pa semèn pou wè si dat tribinal ou a chanje.

Kijan ou kapab jwenn yon avoka imigrasyon nan peyi Etazini?

• Tout moun gen dwa jwenn yon avoka imigrasyon, men sa sèlman vle di ke:
  • Yo kapab gen yon avoka ki ede yo ak ka imigrasyon yo.
  • Si ou gen yon avoka, ou gen dwa pou mande avoka sa a pale nan dat tribinal ak reyinyon gouvènman yo oswa entèvyou yo.
• Gouvènman ameriken an pap peye yon avoka pou pwosedi imigrasyon. Men, anpil òganizasyon benevòl bay moun sèvis legal gratis oswa sèvis legal pou yon tikras kòb. Ou kapab jwenn yon avoka atravè òganizasyon sa yo.
• Sitwèb sa a ka ede w jwenn yon avoka atravè yon òganizasyon benevòl: https://www.immigrationadvocates.org/legaldirectory.
• Òganizasyon benevòl yo gendwa pa gen yon avoka nan zòn kote ou bezwen youn nan. Si sa rive, ou gendwa bezwen jwenn epi peye pou avoka prive. W ap bezwen peye avoka sa yo pou èd yo.
• Sitwèb sa a ka ede w jwenn avoka prive: https://help.asylumadvocacy.org/private-attorneys/.
• Si yo arete w Ozetazini, gouvènman ameriken an ta dwe ba w yon lis avoka gratis. Si w nan CBP, ou ta dwe jwenn yon lis avoka gratis tou. Ou dwe eseye rele nimewo ki sou lis la anvan entèvyou gouvènman yo.
• Atik sa a ka ede w aprann plis sou "entèvyou krent kredib." Entèvyou krent kredib yo se yon kalite entèvyou gouvènman an fè.
• Li enpòtan pou w aplike pou azil anvan ou gen yon lane Ozetazini. Ou bezwen aplike anvan lè sa a, menm si ou poko gen yon avoka.