IRAP te kreye yon chatbot refijye yo ak fanmi yo ka itilize pou jwenn enfòmasyon jiridik epi mande èd jiridik ki gen rapò ak reyentegrasyon refijye yo, reyinifikasyon fanmi yo ak Viza Imigran Espesyal yo (SIV). Sa yo se kesyon yo poze souvan nou resevwa sou zouti a:

Kisa ki yon chatbot?

Yon chatbot se yon pwogram enfòmatik ki fèt pou kominike avèk itilizatè yo epi bay enfòmasyon oswa sèvis ki itil.

Kisa chatbot IRAP la fè?

IRAP te kreye chatbot sa a pou ba w enfòmasyon jiridik ki gen rapò ak reyentegrasyon refijye yo, reyinifikasyon fanmi ak Viza Espesyal Imigran yo (SIV). Li detèmine tou si IRAP ta kapab ede w.

Poukisa IRAP itilize yon chatbot?

IRAP resevwa anpil demann pou èd. Malerezman, li difisil anpil pou nou reponn tout moun. Chatbot nou an ka distribye enfòmasyon jiridik e analize dosye pou èd IRAP nan yon fason ki pi efikas.

Èske mwen ka mande asistans nan men IRAP atravè chatbot la?

Nenpòt moun ka itilize chatbot la pou mande èd nan men IRAP. Sepandan, chatbot la pral pèmèt ou sèlman soumèt yon demann pou asistans si ou nan yon sitiyasyon IRAP ka ede ak si IRAP ap pran nouvo dosye.

Ak kisa mwen ka jwenn èd?

Tanpri li atik sa a pou plis enfòmasyon sou sèvis nou yo.

Poukisa IRAP pa pran nouvo dosye reyentegrasyon nan zòn mwen an?

IRAP kapab sèlman pran yon kantite dosye limite alafwa. IRAP pa ka ede tou ak tout kalite aplikasyon nan chak peyi. Gid sa a esplike plis apwopo èd IRAP bay la..

Si chatbot la di ou nou pa pran demann nan peyi ou, swiv paj Facebook nou an ak sit entènèt nou an. N ap pibliye mizajou la si gen chanjman ki afekte ki moun ki ka soumèt yon demann bay IRAP.

Konbyen tan li pran pou yo reponn demann mwen an?

Li nòmalman pran ekip IRAP la apeprè de a kat semèn pou reponn yon demann pou èd ki soumèt atravè chatbot la. Pafwa sa ka pran plis tan si nou gen yon gwo kantite demann pou èd.

Èske mwen ta dwe soumèt yon lòt demann pou èd si nou pa reponn?

Tanpri pa soumèt plizyè demann pou èd. Nou se yon ti ekip, epi soumèt plizyè demann rann li pi difisil pou nou revize soumisyon tout moun. 

Kijan pou mwen pale ak chatbot la?

Pou pale ak chatbot la, ajoute @irapchatbot sou Telegram oswa voye mesaj ban nou sou Facebook. Apresa, tape "bonjou" kòm premye mesaj ou. Chatbot la ap reponn ou epi poze w yon seri kesyon sou sitiyasyon w.

Si w ap itilize Telegram, klike sou bouton fenèt ki akote bwat tèks la pou wè ki opsyon ki disponib pou reponn yon mesaj. Opsyon sa yo parèt otomatikman sou Facebook.

Kisa mwen ta dwe fè si mwen fè yon erè lè m ap pale ak chatbot la?

Ou p ap kapab chanje repons ou voye bay chatbot la apre ou kòmanse yon konvèsasyon. Si ou fè yon erè, rekòmanse konvèsasyon an lè w ekri "bonjou". Ou ka mete fen tou nan konvèsasyon an lè w ekri "fen" nenpòt kilè.

Kijan pou mwen rapòte yon erè nan chatbot la?

Si w rankontre yon pwoblèm pandan w ap itilize chatbot la, tape "000" nan chat la. Sa a ap met fen nan konvèsasyon an. Yo ap mande w enfòmasyon sou pwoblèm ou genyen an. IRAP pa ka reponn ak mesaj sa yo dirèkteman, men nou kontwole kòmantè epi mete ajou chatbot nou an jan sa nesesè.