یادونه: د ۲۰۲۵ کال د مې له ۱۵مې راهیسې، د متحده ایالاتو د پناه غوښتونکو د منلو پروګرام (USRAP) د ډېری نویو غوښتنلیکونو لپاره ځنډول شوی دی. تاسو کولی شئ دلته د USRAP د اوسني وضعیت په اړه نور معلومات ترلاسه کړئ.

لنډیز 

P-1 او P-2 پروګرامونه (افغانانو لپاره لومړیتوب 1 او لومړیتوب 2 پروګرامونه) ځینو افغانانو لپاره لاره هواروي چې په متحده ایالاتو کې د بیامیشتیدنې لپاره په پام کې ونیول شي.

د افغانستان اتباع، متحده ایالاتو ته د کډوالو د میشتیدنې پروګرام ته په مستقیم ډول درخواست نشی کولی. په متحده ایالاتو کې میشت د کورنۍ غړي، دوستان او وکیلان/قانونپوهان هم نشی کولی دوی راجع کړي. دا کسان باید د لاندې افرادو یا موسساتو له لارې راجع شي:

• د متحده ایالاتو د حکومت کارکوونکی یا شرکت/موسسه چې د متحده ایالاتو له حکومت سره اړیکه لري
• د متحده ایالاتو سره تړلی شرکت یا موسسه چې د افغانستان تبعه یې په دې هیواد کې په دندو ګومارلی دی.

P1 او P2 پروګرامونه د ویزې په کتګورۍ کې نه راځي او همداراز د غیرکډوالۍ P ویزې کتګورۍ سره هیڅ اړیکه نلري. د کډوالو د میشتیدنې پروګرام او P1 او P2  پروګرامونه د کډوالۍ د ځانګړې ویزې پروګرام (ایس آی وي) او د لنډمهاله بشردوستانه اقامت ویزې سره توپیر لري.

د افغانانو لپاره د P1  او P2 پروګرامونو ټول اړوند پیامونه د @state.gov، @wrapsnet.org، یا د usrapprod@servicenowservices.com  بریښنالیکونو له لارې ترلاسه کیږي. هیله کوو چې خپل معلومات له مشکوکو بریښنالیکونو سره مه شریکوئ. 

 د افغانستان تبعه P-1 پروګرام ته څرنګه راجع کیدی شي؟

P-1 یا لومړۍ شمیره لومړیتوب لرونکی پروګرام هغه پروګرام دی چې له لارې یې افراد د کډوالو د بیا میشتیدنې پروګرام ته راجع کیږي. د P-1 متقاضیان باید د متحده ایالاتو د سفارتونو، غیردولتي موسساتو او د کډوالو په چارو کې د ملګرو ملتونو عالي کمیشنرۍ له خوا راجع شي. اشخاص په خپله نشي کولی په مستقیمه توګه P-1 پروګرام ته درخواست وکړي.

په مجموع کې، د متحده ایالاتو سفارتونو په ندرت سره کسان راجع کړي دي. خو د 2021 کال د اګست څخه را په دې خوا، ځینې افغانان چې د متحده ایالاتو د سفارت پخوانیو کارکوونکو سره یې معرفت درلود P-1 پروګرام ته د راجع کیدنې لپاره غوره شوي دي. که چیرې یو افغان د متحده ایالاتو د حکومت له کارکوونکي سره شخصي معرفت لري، کولی شي له نوموړي څخه دې پروګرام ته د راجع کولو په برخه کې د مرستې غوښتنه وکړي. که چیرې د متحده ایالاتو کارکوونکي له یو افغان سره شخصي معرفت لري، کولی شي نوموړی دې پروګرام ته راجع کړي. دا شخص باید د متحده ایالاتو د حکومت له یو لوړپوړي کارکوونکي څخه منظوري ترلاسه کړي. 

د سفارت P-1 پروګرام ته د افغانانو د راجع کیدنې لپاره د بهرنیو چارو د وزارت د لارښود په اړه معلومات دلته ترلاسه کولی شۍ.

ځینې غیردولتی موسسات کولی شي اشخاص P-1 پروګرام ته راجع کړي، خو د متحده ایالاتو دولت یې باید د راجع کوونکو موسساتو په توګه واجد شرایط وګڼي. IRAP د هغو غیردولتي موسساتو په باب چې اوس مهال یې له افغانستان څخه عارضین دې پروګرام ته راجع کړي وي، معلومات نلري.

د کډوالو په چارو کې د ملګرو ملتونو عالي کمیشنری هر کال ډیر درخواست کوونکي P-1 پروګرام ته راجع کوي خو دا موسسه یو ډیر محدود شمیر کډوال هر کال د بیامیشنیدنې لپاره، راجع کوي. دا سازمان یوازې د بیامیشتیدنې لپاره وګړي راجع کوي، یعنې یوازې هغه کسان چې له خپل اصلي هیواد څخه بهر دي.

یو افغان P-2 پروګرام ته څرنګه راجع کیدی شي؟

د متحده ایالاتو دولت د 2021 کال په اګست کې د ځینو افغانانو لپاره چې متحده ایالاتو سره تړاو لري، د P-2 پروګرام جوړ کړ. هغه افغانان کیدی شي P-2 پروګرام لپاره وړ وي چې په افغانستان کې یې په لاندې پروګرامونو کې دنده ترسره کړې وي:

• د متحده ایالاتو له خوا تمویل شوي پروګرامونه، د بلاعوضو مرستو د تطبیق پروژې او یا د متحده ایالاتو تعاوني قراردادونه

• د فرعي قراردادیانو کارکوونکي او د بلاعوضو مرستو فرعي ترلاسه کوونکي P-2 پروګرام لپاره واجد شرایط نه دي.

• په متحده ایالاتو کې میشتې رسنۍ
• په متحده ایالاتو کې میشت غیردولتي سازمانونه

د افغانستان اتباع دغه راز په هغه صورت کې دې پروګرامونو ته واجد شرایط دي چې د کډوالۍ ځانګړې ویزې پروګرام ته د درخواست لپاره، د خدمت د ناکافي مودې له امله، واجد شرایط نه بلل کیږي. په دې کتګورۍ کې په افغانستان کې د لاندې پروګرامونو کارکونکي شاملیدلی شی:

• که چیرې له یو کال څخه لږې مودې لپاره یې د متحده ایالاتو د دولت له قراردادیانو سره د کارمند په توګه دنده ترسره کړې وي.

• د فرعي قراردادیانو کارکوونکي P-2 پروګرام ته واجد شرایط نه بلل کیږي.

• که چیرې د متحده ایالاتو له حکومت سره یې د محلي یا ځایي کارکوونکي په توګه له یو کال څخه لږې مودې لپاره دنده ترسره کړې وي.
• که چیرې د شفاهي/تحریري ژباړونکي په توګه د متحده ایالاتو حکومت، په افغانستان کې د متحده ایالاتو ځواکونو (USFOR-A)، نړیوالو سوله ساتو ځواکونو (ISAF)، او یا غوڅ ملاتړ ځواکونو سره له یو کال څخه لږې مودې لپاره دنده ترسره کړې وي.

د افغانستان اتباع نشي کولی په مستقیم ډول P-2 پروګرام ته درخواست وکړي. ‌د متحده ایالاتو د دولت یو کارکوونکی باید ستاسو په استازیتوب تاسو P-2 پروګرام ته راجع کړي. 

هغو افغانانو چې په رسنیزو او غیردولتي موسساتو کې چې مرکزي دفترونه یې په متحده ایالاتو کې دي دنده ترسره کړې وي، باید د یو لوړپوړي چارواکي له خوا چې د متحده ایالاتو تبعه وي او په متحده ایالاتو کې په مرکزي دفتر کې کار کوي، راجع شي. د بهرنیو چارو د وزارت د اوسني لارښود په چوکاټ کې، په دې پروګرام کې دا لاندې موارد لازم نه ګڼل کیږي:

• په پروژه، د بلاعوضو مرستو تطبیق او یا د قرارداد په تطبیق کې د خدمت موده.
• هغه سپارښتنې یا سفارشنامې چې د شخص د خدمت ارزښت یا اهمیت څرګندوي.
• او یا دا چې د شخص دندې د متحده ایالاتو له خوا تمویل شوې پروژې سره څو فیصده ارتباط درلود.

که چیرې تاسو په متحده ایالاتو کې میشته رسنۍ یا غیردولتی موسسه کې کار نه وي کړی، تاسو باید د متحده ایالاتو د یو چارواکي له خوا چې ستاسو کارفرما ته یې بودجه برابروله، راجع شئ. ستاسو کارفرما یا سوپروایزر باید د متحده ایالاتو حکومتي چارواکي یا موسسې سره چې ستاسو کار ته یې بودجه برابره کړې وه، اړیکه ونیسي او د راجع کولو د څرنګوالي په اړه معلومات ترلاسه کړي.

د دفاع وزارت هم یو بریښنالیک لري چې د دفاع وزارت کارکوونکي کولی شي چې د P1 او P2  پروګرامونو لپاره د عارضینو د راجع کولو لپاره یې وکاروي osd.pentagon.ousd-policy.mbx.afgreferrals@mail.mil. د دفاع وزارت دا هم څرګنده کړې ده چې دا بریښنالیک یوازې د دفاع وزارت کارکوونکو لپاره دی او دممهال د افغانانو لپاره کوم بریښنالیک یا پروسه نشته چې دفاع وزارت څخه په مستقیم ډول P1 او P2  پروګرامونو ته د راجع کیدنې درخواست وکړي. که چیرې تاسو په افغانستان کې له خپل کارفرما سره اړیکه نه لرۍ، تاسو کولی شۍ د متحده ایالاتو د حکومت له یو کارکوونکي سره چې ستاسو د کار او د متحده ایالاتو له خوا د بلاعوضو مرستو د پروژې د تمویل په اړه چې تاسو پکې دنده ترسره کوله معلومات ولري، اړیکه ونیسۍ.

د بهرنیو چارو وزارت یو مفصل لارښوود په انګلیسي ژبه خپور کړی دی چې دلته ترلاسه کیدی شي.

د کورنۍ واجد شرایط غړي

که چیرې تاسو P2 پروګرام ته واجد شرایط یاست، ستاسو کارفرما کولی شي به دا لاندې کسان دې پروګرام ته راجع کړي:

• تاسو
• ستاسو میرمن یا خاوند
• ستاسو ماشومان (هر سن کې چې وي، مجرد یا واده شوي)

د بهرنیو چارو وزارت دا نه ده په ډاګه کړې چې د واجد شرایط شخص د وفات په صورت کې د نوموړي میرمن/خاوند یا ماشومان دې پروګرام ته درخواست کولی شي او که نه.

 دا پروسه څومره وخت نیسي؟

هغه کسان چې د P1 او P2 پروګرامونو په چوکاټ کې راجع کیږي هم باید پراخ طی مراحل یعنې مرکې او امنیتي ارزونې بشپړې کړي. ددې پروګرامونو له لارې د راجع شویو کسانو د میشتیدنې هیڅ ډول تضمین نشته. د IRAP د کډوالو د میشتیدنې د پروسې معلومات دلته ترلاسه کولی شۍ. د IRAP په اټکل، دا پروسه به څو کاله وخت نیسي.

دممهال د افغانستان دننه د کډوالو د میشتیدنې د طی مراحل هیڅ ډول پروګرام نشته نوځکه ستاسو کیس به هغه مهال طی مراحل کیږي چې تاسو هیواد پریږدئ. هغه کسان چې افغانستان پریږدي او د غوښتنلیک د منظورۍ لپاره بل هیواد کې انتظار باسي، د متحده ایالاتو او یا د ملګروملتونو د سازمان له خوا به هیڅ ډول مرسته نه ترلاسه کوي.

دا معلومات د متحده ایالاتو د دولت له خوا د خپور شوي لارښود پربنسټ وړاندې کیږي. هرکله چې د متحده ایالاتو حکومت په دې برخه کې نوي معلومات خپاره کړل او د غوښتنلیکونو په طی مراحل کې پرمختک رامنځته شو، IRAP به سمدستي ددې لارښود معلومات نوي کړي.

 ایا د متحده ایالاتو د کډوالو د مرستې پروګرام USRAP د افغانستان دننه بشپړیدی شي؟

دممهال، د افغانستان دننه د کډوالۍ د غوښتنلیکونو د طی مراحل لپاره هیڅ لاره نشته.  یو عارض کولی شي د کډوالۍ ځانګړې ویزې غوښتنلیک د طی مراحل کار د افغانستان دننه پیل کړي او یا هم P1 او P2 ته راجع شي خو د افغانستان دننه ددې غوښتنلیکونو د بشپړولو لپاره هیڅ لاره نشته. 

وروسته له دې چې یو افغان P-1 او P-2 پروګرامونو ته راجع کیږي، څه پیښیږي؟

ترڅو چې درخواست کوونکی له افغانستان څخه وتلی نه وي، د طی مراحل او مرکو بهیر نه پیل کیږي. د متحده ایالاتو حکومت اعلان نه دی کړی چې ددې پروګرام د عارضینو مرکې یا مصاحبې به په کوم هیواد کې ترسره کوي. خو ویلي یې دي چې ددې غوښتنلیکونو طی مراحل به په افغانستان، ایران، شمالي کوریا، سوریه او یمن کې نه ترسره کیږي.

د بهرنیو چارو وزارت لارښود څرګندوي چې وروسته له دې چې یو کارفرما د متحده ایالاتو حکومت ته د عارض معلومات ولیږي او د بهرنیو چارو وزارت د راجع شوي شخص معلومات و ارزوي او پریکړه وکړي چې معلومات بشپړ او نوموړی شخص واجد شرایط دی، د بهرنیو چارو وزارت به noreply@wrapsnet.org  یا usrapprod@servicenowservices.com بریښنالیکونو له لارې عارض سره اړیکه نیسي. د بهرنیو چارو د وزارت همدا بریښنالیک به دا هم څرګندوي چې یو عارض له افغانستان څخه له وتلو وروسته څرنګه د بهرنیو چارو وزارت ته خبر ورکړي.

په یاد وساتئ چې د بهرنیو چارو وزارت له ګومارونکو او راجع کوونکو موسساتو څخه غواړي چې د راجع کیدنې د لړۍ تر بشپړیدنې او منل کیدو، د درخواست کوونکو لپاره د اړیکې د سرچینې په توګه د لاسرسي وړ پاتې شي. د بهرنیو چارو د وزارت له خوا د راجع شوي شخص له منل کیدو وروسته به عارض او کارفرما دواړه له noreply@wrapsnet.org یا usrapprod@servicenowservices.com بریښنالیکونو له لارې بریښنالیک ترلاسه کړي. که چیرې تاسو فکر کوۍ چې د P1 یا P2 پروګرامونو له لارې راجع شوي یاست خو بریښنالیک مو ترلاسه کړی نه دی، تاسو باید د نویو معلوماتو لپاره دا موضوع خپل کارفرما یا هغه شخص سره تعقیب کړئ چې تاسو یې راجع کړي یاست.

د کډوالو د بیامیشتیدنې په پروسه کې لږترلږه دوه مرکې، امنیتي ارزونې او روغیتایي معاینات شامل دي. د متحده ایالاتو حکومت اټکل کړی دی چې د طی مراحل پروسه به له یو کال څخه ډیره موده دوام کوي. IRAP په دې باور دی چې طی مراحل کیدی شي څو کاله دوام وکړي. د کډوالو د بیامیشتیدنې د پروسې په اړه د IRAP لارښود دلته ترلاسه کولی شۍ.

آیا کولی شم په یو وخت کې P-1 یا P-2 او د کډوالۍ نورو پروګرامونو ته درخواست وکړم؟

هو. IRAP د درخواست نورو لارو په باب په خپله ویب پاڼه iraplegalinfo.org  کې لارښودونونه خپاره کړي دي. په دې ویب پاڼه کې د کډوالۍ ځانګړې ویزې، د کورنیو بیا سره یوځای کیدو، او لنډ مهال اقامت بشردوستانه ویزې په باب معلومات خپاره شوي دي.

 ایا کولی شم د متحده ایالاتو دننه P-1 او P-2 پروګرامونو ته درخواست وکړم؟

هغه کسان چې د P-1 یا P-2 پروګرامونو په چوکاټ کې راجع شوي خو متحده ایالاتو ته یې د لنډ مهال اقامت بشردوستانه ویزه ترلاسه کړې وي، نشي کولی د خپل غوښتنلیک طی مراحل په متحده ایالاتو کې بشپړ کړي. دا کسان باید په متحده ایالاتو کې د قانوني دایمي اقامت لپاره، د حقوقي مرستو لټه وکړي.