عمومي کتنه

په فرانسه کې پناه غوښتونکي او د ځانګړي خوندیتوب لرونکي د خپلې کورنۍ له غړو سره د بیایوځای کېدو حق لري. دا په دې معنی ده چې دوی کولی شي د خپلې کورنۍ ځینو غړو لپاره چې په بهر کې ژوند کوي، د ویزې غوښتنه وکړي. دا ویزه به د دوی خپلوانو ته اجازه ورکړي چې سفر وکړي او فرانسې ته ولاړ شي.

که تاسو پناه غوښتونکی یاست، یا د فرعي خوندیتوب موقف لرئ، یا په فرانسه کې د تابعیت نه لرونکی یو شخص یاست، تاسو کولی شۍ چې خپلې میرمن/خاوند، د ژوند ملګري او کوچنیو ماشومانو لپاره درخواست وکړئ ترڅو په فرانسه کې تاسو سره یوځای شي. که په داسې وضعیت کې تاسو یو بې سرپرسته ماشوم یاست، تاسو کولی شۍ چې خپلې مور او پلار او د هغوی کوچنیو ماشومانو لپاره درخواست وکړئ ترڅو په فرانسه کې تاسو سره یوځای شي. تاسو مالي ملاتړکوونکي (Sponsor) یاست. په بهر کې ستاسو د کورنۍ غړي غوښتونکي (Applicants) دي.

یادونه: په فرانسه کې د کورنۍ د غړو د بیایوځای کېدو لپاره بله پروسه هم شته. دا پروسه هر هغه بهرني کس لپاره پرانسیتې ده چې په فرانسه کې د استوګڼې معتبر جواز لري. پناه غوښتونکي یا د فرعي خوندیتوب لرونکي چې واده یې کړی، په فرانسه کې د پناه له غوښتنې وروسته له دې پروسې څخه ګټه پورته کولی شي. د دې پروسې لپاره بېلابېل شرایط شتون لري چې په دې لارښود کې ترې یادونه نه ده شوې. که تاسو غواړئ د دې ډول غوښتنلیک په اړه نور معلومات ولرئ، تاسو کولی شئ د فرانسې د دولت په وېبپاڼه کې یې ولولئ.

څوک پر شرایطو برابر دي؟

د ژوند ملګري یا شریک لپاره شرایط

• تاسو او ستاسو د ژوند ملګري 18 کاله یا ډېر عمر لرئ
• دا په دې معنی ده چې تاسو فرانسې ته له ننوتلو او پناه غوښتنې ته له درخواست کولو مخکې، واده کړی وو او یوه جدي او باثباته اړیکه مو پیل کړې وه.

ماشوم لپاره شرایط (د زویولي یا فرزندي ماشوم په ګډون)

• ستاسو له اوسني ګډ ژوند څخه نړۍ ته راغلي ماشوم عمر باید د غوښتنلیک په وخت کې له 19 کلونو څخه کم وي. دا هغه مهال دی چې ستاسو د کورنۍ غړي په سفارت کې غوښتنلیک سپاري.
• تاسو یا ستاسو د ژوند اوسنی ملګری باید ددې ماشوم سرپرستي په غاړه واخلي، او د سرپرستۍ فیصله باید د یوې بهرنۍ محکې له خوا صادر شي. که داسې فیصله موجوده نه وي، تاسو باید دا ثبوت کړئ چې ستاسو او ستاسو د ژوند د ملګري ترمنځ اړیکه رامنځته شوې ده، یا دا چې د ماشوم بل مور یا پلار مړ شوی دي یا د ماشوم بل مور یا پلار د مور یا پلار په توګه خپل حق له لاسه ورکړی دي. که د ماشوم بل مور یا پلار تراوسه ژوندی دي، تاسو باید ثبوت کړئ چې د ماشوم د راوړلو په باب مو د نوموړي اجازه ترلاسه کړې ده.

د والدینو او خور او ورور لپاره شرایط

• که تاسو یو بې سرپرسته ماشوم یاست، ستاسو مور او پلار کولی شي تاسو سره په فرانسه کې یوځای شي. دا په دې معنی چې تاسو له 18 کلونو څخه کم عمر لرئ او په فرانسه کې یوازې ژوند کوئ.
• ستاسو شوي ورونه او خویندې که له 18 کلونو څخه کم عمر ولري، کولی شي تاسو سره په فرانسه کې یوځای شي. دوی چې کله فرانسې ته ځي باید ستاسو مور او پلار سره یو ځای وي.

غوښتنلیک څرنګه وړاندې کېږي

د کورنۍ د بیایوځای کېدو د غوښتنلیک سپارلو لپاره، تاسو اړتیا لرئ چې د کورنۍ د هر غړي لپاره د "اوږد مهاله" ویزې فورمې ډکې کړئ. تاسو د اوږدې مودې ویزې د فورمې ډکولو لپاره باید انلاین اکونټ جوړ کړئ. ټول معلومات په انلاین بڼه د فرانسې د ویزې په وېبپاڼه کې وړاندې کړئ.

د دې فورمې له ډکولو او سپارلو وروسته، تاسو باید د فرانسې په اړونده کونسلګرۍ کې د خپلې کورنۍ غړو ملاقات لپاره وخت واخلئ. تاسو باید په هغه هېواد کې د ملاقات وخت ونیسئ چېرې چې ستاسو کورنۍ ژوند کوي. تاسو کولی شئ دلته ومومئ چې ستاسو کورنۍ لپاره اړونده کونسلګرۍ چېرته ده. دا وېبپاڼه به تاسو ته وښیي چې تاسو کولی شئ د خپلې کورنۍ لپاره انلاین وخت وټاکئ او که نه. که په انلاین بڼه وخت نشئ ټاکلی، تاسو اړتیا لرئ چې کونسلګرۍ ته برېښنالیک ولېږئ یا دوی ته زنګ ووهئ ترڅو ستاسو د کورنۍ غړو  لپاره د ملاقات وخت وټاکي. کونسلګرۍ سره توپیر لري او دا تل شوني نه وي چې تاسو په انلاین بڼه د خپلې کورنۍ غړو لپاره د ملاقات وخت وټاکئ.

په هغه هېواد کې چې ستاسو کورنۍ اوسېږي کېدی شي هلته د فرانسې کونسلګرۍ شتون ونلري. په دې حالت کې، ستاسو کورنۍ باید په ګاونډي هېواد کې د فرانسې کونسلګرۍ ته لاړ شي.

غوښتنلیک کله وړاندې کېږي

همدا چې په فرانسه کې ستاسو د پناه غوښتنه ومنل شي او یا د فرعي خوندیتوب وضعیت ترلاسه کړئ، تاسو کولی شئ د کورنۍ د بیایوځای کېدو لپاره غوښتنه وکړئ. دا هغه وخت دی چې تاسو د خپلې پناه غوښتنې په تړاو د پناه غوښتونکو او تابعیت نه لرونکو د ساتنې ادارې (OFPRA) څخه پرېکړه ترلاسه کوئ.

هغه اسناد چې تاسو په خپل غوښتنلیک کې شاملولو ته اړتیا لرئ

ستاسو د کورنۍ غړي باید دا لاندې اسناد د ملاقات لپاره له ځانه سره راوړي:

• د اوږدمهاله استوګنې ویزې دوه ډک شوي فورمې. د ویزې فورمه دلته په برېښنايي بڼه (په فرانسوي، عربي، یا انګلیسي ژبو) شتون لري (ننوتل اړین دي).
• د دوی پاسپورټ یا د پېژندنې نور اسناد که چېرې دوی پاسپورت نه لري او نشي اخیستی
• د پاسپورټ په اندازه دوه انځورونه د کورنۍ هر غړي لپاره چې د ویزې په غوښتنلیک کې شامل وي

○ که له غوښتونکو څخه کوم یو یې حجاب ولري، هغه باید د پاسپورټ د انځور د اخیستو پرمهال حجاب لیرې کړي. دا د فرانسې دولت د مقرراتو له کبله دی.

• ستاسو د OFPRA پرېکړه تاسو ته په فرانسه کې خوندیتوب درکوي
• په ځایي اسعارو د هر کس په سر باندې 99 یورو ورکول
• د کورنۍ له غړو سره ستاسو د اړیکې په تړاو اسناد (لاندې برخې ولولئ)

د کورنۍ غړو سره ستاسو د تړاو اسناد

کله چې خپل د ژوند ملګري یا شریک لپاره غوښتنه کوئ، تاسو د خپلې اړیکې د ثابتولو په موخه باید اسناد او شواهد وړاندې کړئ. لاندې اسناد شامل دي:

• ستاسو نکاح خط یا
• د OFPRA لخوا وړاندې شوي د مدني حالت اسناد

کله چې خپل ماشوم لپاره غوښتنه کوئ، تاسو د خپلې اړیکې د ثابتولو په موخه باید اسناد او شواهد وړاندې کړئ. لاندې اسناد شامل دي:

• د دوی د زېږون کارت چې تاسو د مور یا پلار په توګه وښيي
• که تاسو دا سند نلرئ، تاسو کولی شئ یو داسې دیني یا بل قانوني سند وسپارئ چې تاسو د قانوني سرپرست په توګه وښيي. د مثال په توګه، د یو معتبر دیني مرکز لخوا ورکړل شوی سند.

کله چې خپل مور او پلار لپاره غوښتنه کوئ (که تاسو ماشوم یاست) نو تاسو د خپلې اړیکې د ثابتولو په موخه باید اسناد او شواهد وړاندې کړئ. لاندې اسناد شامل دي:

• ستاسو د زېږون کارت چې هغوی ستا د مور او پلار په توګه وښيي
• که تاسو دا سند نلرئ، تاسو کولی شئ یو دیني یا بل قانوني سند وسپارئ. د بیلګې په توګه، د معتبر دیني مرکز لخوا ورکړل شوی سند.

تاسو همداراز باید نور اسناد چمتو کړئ ترڅو ستاسو د کورنۍ د اړیکې په اړه شواهد وړاندې کړي:

• ستاسو د پناه غوښتنې غوښتنلیک
• د پناه غوښتنې مرکه په لیکلې بڼه
• د کورنۍ د راجع کولو فورمه چې په فرانسه کې تاسو ته د خوندیتوب ورکولو څخه وروسته بشپړه شوې وي
• ستاسو د واده/ د ژوند ملګري/ ماشومانو/ والدینو/ خویندو او ورونو انځورونه
• له خپل ژوند ملګري/ماشومانو /والدینو/ خویندو او ورونو سره خبرې او اړیکې
• دوی ته د پیسو لېږد چې ښیي تاسو د هغوی مالي ملاتړ کوئ
• یو لیک چې وښيي تاسو څنګه سره ولیدل او څنګه سره جلا شوئ او داسې نور
• د هغو خلکو څخه یو لیک چې تاسو او ستاسو د کورنۍ غړي پېژني. په لیک کې باید ستاسو د کورنۍ اړیکو په اړه بحث شوی وي
• که دوی اوس ستاسو په اصلي هېواد کې نه وي، ستاسو د لیدنو او ملاقاتونو ثبوت

د غوښتنلیک له سپارلو وروسته څه پېښېږي؟

وروسته له دې چې ستاسو د کورنۍ غړي د ویزې لپاره غوښتنه کوي، کونسلګرۍ د فرانسې په نانټس کې د پناه غوښتونکو د کورنۍ څانګې سره اړیکه نیسي. د پناه غوښتونکو د کورنۍ څانګه د فرانسې د کورنیو چارو وزارت د کډوالۍ ریاست پورې اړونده اداره ده. یاده اداره به دا تصدیق کړي چې ستاسو خپلوان (غوښتونکي) په فرانسه کې ستاسو د کورنۍ د غړو په توګه ثبت شوي دي او که نه. کونسلګرۍ به دا هم تایید کړي چې هغه اسناد چې تاسو سپارلي، سم دي.

تاسو (مالي ملاتړکوونکي یا سپانسر) به یوه فورمه ترلاسه کړئ چې ستاسو د کورنۍ د غړو په اړه د معلوماتو غوښتنه کوي. دا اړینه ده چې هغه معلومات چې تاسو یې وړاندې کوئ له هغه معلوماتو سره ورته وي چې ستاسو د کورنۍ غړي په خپل غوښتنلیک کې لیکلي دي.

د فرانسې دولت به د لاندې اسنادو غوښتنه هم وکړي:

• ستاسو د استوګڼې کارت د دواړو مخونو یوه کاپي
• ستاسو د سفر اسنادو د ټولو پاڼو یوه کاپي
• ستاسو د استوګڼ ځای ثبوت (چېرې چې تاسو اوسېږئ) (لکه د اوبو او برېښنا د لګښت سند، ستاسو د کور د کرایې قرارداد او داسې نور)
• هر هغه اسناد چې ستاسو د کورنۍ غړو سره ستاسو اړیکه ښیي. د دې مثالونه په لاندې ډول دي:

○ د کورنۍ انځورونه

○ د کورنۍ غړو ته د پیسو لېږد ښیي چې تاسو د هغوی مالي ملاتړ کوئ

○ کورنۍ غړو سره د ټلیفون او ستاسو د نورو اړیکو مخینه

• په فرانسوي ژپه ژباړل شوي ستاسو د کورنۍ غړو د مدني حالت د اسنادو کاپي وړاندې کول که چیرې د اجرا وړ وي
• د کورنۍ د ژوندانه د لګښت ورکولو ثبوت
• په فرانسه کې ستاسو د ټولنیز خوندیتوب حق د سند کاپي

هغه پوښتنلیک چې تاسو ته لېږل کېږي باید ژر یې ځواب او بشپړ کړئ. بیا تاسو دا پوښتنلیک او نور ټول اسناد لاندې پتې ته ولېږئ:

د کورنیو چارو وزارت

د کډوالو ریاست

د پناه غوښتونکو د کورنیو څانګه

BP 43605 - 44036 NANTES cedex 1

د فرانسې دولت له دوو څخه تر څلورو میاشتو پورې وخت ته اړتیا لري چې ستاسو د غوښتنلیک په اړه پرېکړه وکړي. دولت کولی شي د اړتیا په صورت کې د نورو څلورو میاشتو مودې د تمدید غوښتنه وکړي. په ځینو قونسلګریو کې دا موده په اتومات ډول غځېږي. ستاسو د کورنۍ غړي به د پرېکړې څخه خبر شي. که چېرې د پناه غوښتونکو د کورنۍ څانګې ته د فورمې بېرته لېږلو دوو میاشتو په موده کې کومه پرېکړه ونشي، تاسو کولی شئ د پرېکړې په تړاو معلوماتو لپاره له اړوندې کونسلګرۍ سره اړیکه ونیسئ.

که دولت د ویزې غوښتنلیک ومني، ستاسو د کورنۍ غړي به ویزې ترلاسه کړي. که دوی پاسپورت ونلري، د فرانسې دولت به  هغوی ته د سفر لنډمهاله سند صادر کړي. د ویزې د صادرولو شرایط کونسلګرۍ پورې اړه لري. په ځینو مواردو کې، کونسلګرۍ به ستاسو د کورنۍ غړو ته د ویزې او سفري اسنادو ورکولو دمخه د الوتنې د ټکټ غوښتنه وکړي.

د مرستې غوښتنه کول

تاسو یا ستاسو خپلوان ممکن د دې پروسې په برخه کې د کډوالۍ یو وکیل څخه مرسته وغواړي. IRAP په فرانسه کې د کورنۍ د بیایوځای کېدو په قضیو کې د مرستې لپاره محدود ظرفیت لري. د IRAP څخه د مرستې غوښتنې په برخه کې د معلوماتو لپاره دې لینک ته مراجعه وکړئ.

نور لینکونه

• د کورنۍ د یوځای کولو پروسې لنډیز کوونکی فرانسوي انفوګرافیک

• د کورنۍ د بیا یوځای کېدو حق په اړه د کډوالو لپاره د فرانسې د حکومت معلومات (په انګلیسي، عربي، پښتو، دري، روسي، ټیګرینیا او اوکرایني ژبو هم شتون لري)

• د کورنۍ د بیا یوځای کیدو د حق په اړه د فرانسې د حکومت معلومات

  • په انګلیسي، عربي، پښتو، تیګرینیا او دري ژبو د معلوماتو لپاره لاندې لاړ شئ